Tripura High Court-in thupek chhuah

Tripura High Court chuan state sorkar leh Tripura State Pollution Control Board (TSPCB) te chu Noise Pollution tih ziaawmna tura hma la turin a hriattir.

July 15 khan Tripura High Court Acting Chief Justice T. Vaiphei leh Justice Subhashish Talapatra te chuan state sorkar leh Tripura State Pollution Control Board (TSPCB) te hriattirna hi a chhuah a ni. Court chuan Noise Pollution tih ziaawm a nih theih nan hian District level committee te chu kum khatah vawi hnih tal
ṭhukhawm ṭhin turin a hriattir bawk. Lirthei horn bakah mipui tana ri bengcheng leh hnawksak te chu Tripura-ah hian khap vek a nih thu Court chuan a tarlang. Thupek chuan Central Motor Vehicles Rules, 1989 a bawhchhiat loh thu leh school, college, hospital, court, office bul hnaiah te ri bengchheng siam khap a nih thu tarlan a ni bawk.

Thuneitute chuan Court thupek hi khauh takin an kengkawh dawn a, dan bawhchhetu chu Magistrate phalna loa chhuah theih a ni dawn lo a, dan an bawhchhe nawn a nih chuan an lirthei emaw eng bungrua emaw pawh ni se High Court phalna lo chuan a neitu hnenah pek chhuah khap a ni.

Sub-Divisional Police Officers (SDPO) leh District magistrate te chu hma lo la tura hriattir an ni. Noise Pollution (Regulation and Control) Rules, 2000 chu Tripura-ah hian hman an ni ang. Tripura State Pollution Control Board Chairman Amitabha Deb Roy chuan Court thupek chu bawhzui nghal a nih thu a sawi.