Sarma-a'n Congress a bei

Assam Finance Minister leh Rajya Sabha member ni bawk Himanta Biswa Sarma chuan Prime Minister hlui, Manmohan Singh kaihhruai Congress sorkar khan Assam state ṭhatna turin hma a la lo niin a sawi.

Thawhṭanni khan Legislative Assembly complex-ah Sarma hian press conference neiin, "Sorkar laipuia Congress sorkar khan Assam chu chhiah uchuak takin a chawi tir a ni, hemi avang hian state sorkar chuan cheng vaibelchhe 8,000 vel a hloh a ni" a ti. Hemi chungchangah hian state chu Supreme Court-ah zualko duhloin Tarun Gogoi-a kaihhruai sorkar chuan chhiah a chawi ṭeuh ṭeuh a, a tuartu chu mipuite an ni, a ti. He thil hi hi Assembly-ah a sawi chhuah tur thu Sarma chuan a sawi bawk.

Sarma chuan Tarun Gogoi-a kaihhruai sorkar kha All India Institute Of Medical Science (AIIMS) dinna hmun tur chungchangah buainaah a mawhphurtu niin a sawi a, Gogoi chuan Revenue Department chu Changsari-a AIIMS din a nih theih nana hma la tura nawrah a puh a ni. Sorkar laipui chuan Changsari-a din tur hian thutlukna a siam zui niin a sawi a, Raha mipuite lungawilohna chu a hriatthiampui thu a sawi bawk.

AIIMS hi Changsari-a din tura ruahmanna siam a nih hnuah Raha mipuite te chu lungawiloin kawng an zawh a, sorkar motor leh bulding eng emaw zat an tichhe zui bawk. Police te chuan lungawilohna lantirtute hi dan tumin an bei a, tear gas hman a nih bakah van lam hawiin silai hmeh puah a ni bawk. Buaina chhuak avang hian mi pakhatin nunna a chan bakah mi eng emaw zatin hliam an tuar a, curfew puan a ni zui bawk. Assam Finance Minister Himanta Biswa Sarma chuan All India Institute of Medical Science hi Raha-a din a nih theih nan hma a lak tur thu a lo sawi tawh a ni.