AP : Zirlaiten bawng talh khap phuta rally neih tum dodal

All-Arunachal Pradesh Students’ Union (AAPSU) chuan spiritual leader Jagat Guru Shankaracharya-a'n September 27-a bawng talh khap a, a humhalhna siam phuta rally huaihawt a tum chu an duh loh thu an sawi.

Zirlai pawl hian Itanagar-a Deputy Commissioner, Talo Potom hnenah ngenna thlenin, rally buatsaih tum chu phalna pe lo turin an ngen. Rally hi huaihawt a nih chuan state chhunga tribal-te nunphung a ti buai dawn a, rally neih chhunga buaina leh harsatna eng emaw a lo thleng palh a nih pawhin state sorkar mawhphurhna a ni ang, an ti.

AAPSU finance secretary, Byabang Hapu Dui chuan DC hnenah permit pe lo tura ngenna a thehluh tawh thu sawiin, hetiang zawnga rally huaihawt hi Arunachal Pradesh state chhungah a thlen an remti ngai dawn lo tih a sawi. State mipui, tualchhung mite rilru ti na thei zawnga thil buatsaih hi an phal lo tih a sawi a ni.

Dui chuan an state-ah sakhua eng pawh an awm a, an rinna thuthlungte an puanzar an dodal ngai lo tih sawiin, mahse a chin tawk an nei thiam tur a ni, a ti. Mi tinin an ei duhzawng thlang turin dikna chanvo an nei vek a, eng sakhua mahin a leilung fate ei tur leh tur loh chungchangah thu an nei tur a ni lo, tiin a sawi.

"Hindu sakhaw pawlte hian bawngsa ei lo turin min rawn ti ngawt tur a ni lo. State chhung mite hian eng sakhua mah bawngsa ei lo tur emaw, kan state-a kan tih dan emaw zawm turin kan ti lui ngai lo. Hei vang hian spiritual leader Jagat Guru Shankaracharya-a'n hetianga a rawn ti ngawt hi a demawmin kan pawm thei ngai lo ang," a ti.

AAPSU hruaitu chuan Arunachal chu hnam hrang hrangte lungrual taka an chen hona ram a ni tiin, sakhaw dangte tihdan phung nek zawnga rally huaihawt tum chuan buaina a chawk chhuak thei dawn niin a sawi. District thuneitute chuan rally buatsaih phalna a pe a nih chuan, state sorkar leh district thuneitute chuan rally neih nia boruak duhawm lo a thleng a nih pawhin mawh an phur dawn tih chiang taka an tih lanna a ni nghal tiin, zirlai pawl chuan a sawi.

Nagaland sorkar chuan an state-a ‘Cow Flag Installation Yatra’ neih tum chu phalna a lo pe duh tawh lo a, Meghalaya-ah pawl hrang hrangin an state-a bawng talh khap duhna lantir tumna chu an dodal bawk.