Rahul Gandhi vau a nih vangin Tripura Congress-in lungawi lohna lantir

Tripura-a eptu pawl, Congress party chuan an party hruaitu, Lok Sabha-a Leader of Opposition (LoP), Rahul Gandhi-a'n vauna tam tak a tawh avangin Nilaini khan BJP leh a thawhpui party dangte laka an lungawi lohna an lantir.

Lungawi lohna lantir hi minister hlui leh Congress working committee member Sudip Roy Barman, Ashish Kumar Saha leh state Youth Congress President Neel Kamal Saha ten kaihruaiin, Congress headquarter-ah BJP an demna thute an aupui bakah an hruaitu lim/thlalak te an hal a ni. Congress state president Asish Kumar Saha chuan Agartala police station-ah complaint a thehlut bawk.

Complaint an thehluhah hian Saha chuan politics lama langsar hming eng emaw zat a tarlang a, an zingah hian Minister of State for Railways Ravneet Singh Bittu, Delhi BJP hruaitu Tarinder Singh Marwah, Shiv Sena (Shinde faction) MLA Sanjay Gaikwad, leh Uttar Pradesh Minister Raghuraj Singh te pawh telin, Rahul Gandhi laka tharum thawhna thlen tur zawnga thu sawiah a puh.

State Congress President chuan heng party hruaitute hian Rahul Gandhi mai bakah Indian National Congress tihnat leh tih hmingchhiat an tum a ni, a ti bawk.