India-Myanmar ramri km 30-a thui hung tawh

Union home minister Amit Shah chuan India-Myanmar ramri hung hna thawh mekah, km 30-a thui chu hung zawh a ni tawh tih Thawhlehni khan a sawi.

Sorkar laipui chuan national security tih changtlun zawkna turin Myanmar leh India ramri, km 1,643-a thui chu hung chhuah vek a tum a, hei hi ramri kaltlanga ruihhlo leh ralthuam tawlh luh ṭhinte venna tura tih a ni. He project atan hian Rs vbc 31,000 a dah nia sawi a ni.

Amit Shah chuan ramri hung hian dan phal loh thil lak luh a khuahkhirh theih dawn bakah, remna leh muanna a thlen a beisei thu a sawi bawk. Cabinet Committee on Security chuan Manipur, Mizoram, Nagaland leh Arunachal Pradesh-a Myanmar ramri hung leh ramri hrula kawng siamte chu a thuphungin a lo phalsak tawh a ni.

He hmalakna hi 2018-a India Act East policy siam zulzuia kalpui a ni a, mahse hmarchhak state ṭhenkhat erawh chuan an dodal thung. Mizoram chuan ramri hung tumna hi a lo dodal tawh a, state assembly-ah pawh project duh lohna resolution an pass a ni. Hemi hnuah Nagaland pawhin ramri hung an duh loh thu hi an sawi ve leh bawk.

Manipur erawh chuan ramri hung hi a thlawp thung a, chief minsiter N Biren Singh chuan Myanmar nen an inri na, km 400-a thui hung hi ruihhlo leh dan phalloh thil lakluh pung zel laka him zawk nan a ngai tih a sawi.

January 20 Guwahati a Assam Police commando passing out parade ah he ramri daidan chungchang kalpui zel anih tur thu Shah hian a sawi a ni.