Zángnadawmna pe turin Manipur sorkar hriattir

Supreme Court chuan Manipur sorkar chu thla li chhunga state sorkar thupeka thah mi 28 chhungte hnenah zángnadawmna pe vek turin Thawhṭanni khan a hriattir.

Supreme Court chuan December 8, 2015 khan thi chhungte hnena zángnadawmna pe tur hian Manipur sorkar chu a lo hriattir tawh a, mahse tun thlengin thi chhungte chuan state sorkar aṭanga zángnadawmna an la dawn loh thu an sawi.

Kum 1979, May thla aṭanga kum 2012 thleng khan sorkar thupekin Manipur-ah hian mi 1528 zet te chu tihhlum an ni a, hemi chungchangah hian Extrajudicial Execution Victims Families Association te chu Court-ah an zualko a ni. Supreme Court chuan thi chhungte hnenah cheng nuai 5 ṭheuh pe turin December 8, 2015 khan Manipur sorkar a hriattir a, sorkarin sum a pek mai loh vangin Apex Court-ah thi chhungte chu an zualko leh a ni.

Manipur sorkar-in zángnadawmna a pek chhuah loh avang hian Supreme Court chuan April 22, 2016 khan thupek a chhuah ve leh. Sorkar chuan thupek a zawm loh avangin Thawhṭanni khan thupek hi chhuah leh a ni a, sorkar chu cheng nuai nga bakah, Court thupek an zawm loh avangin thi chhungte hnenah cheng 50,000 ṭheuh pek belh turin sorkar chu a hriattir a ni. Court hian thla li chhung ngeia zángnadawmna pe chhuak tur leh, hun tiam bawhchhe lo turin a hriattir.

Hetih lai hian State Additional Chief Secretary (home) chuan kumin June 6 khan zángnadawmna atan hian sorkar chuan cheng 1,54,00,000 a pe chhuak a, thi chhungte hnenah hian cheng 5,50,000 ṭheuh pek an ni, a ti. Nunna chan zinga mi Devi nu chuan sorkar aṭangin zángnadawmna sum an la dawng lo tih a sawi thung. Extrajudicial Execution Victims Families Association te chuan sorkar-ah document pawimawh, photocopy, Bank passbook te chu an thehlut tawh tih an sawi a, zángnadawmna erawh cheng khat mah an la dawn loh thu an sawi a ni.