Assam CM hoin AIIMS chungchangah meeting nei

Assam Chief Minister Sarbananda Sonowal chuan Thawhlehni khan Guwahati-ah All India Institute Of Medical Science (AIIMS) dinna hmun tur chungchangah pawl hrang hrang hruaitute a kawm. Chief Minister chuan AIIMS Demand Committee te thil phut leh pawl hrang hrangte ngaihdan chu sorkar laipuiah a thlen a nih tur thu a sawi a ni.

Sonowal chuan tun hnaia AIIMS dinna hmun tur inchuh avanga buaina chhuak chu pawi a tih thu sawiin, nunna chan leh hliam tuarte chu a tawrhpui thu a sawi. Hemi chungchang hi Union Health and Family Welfare Ministry-ah thlen tura hmalak mek a ni. AIIMS dinna hmun tur chungchangah hian inbeihna a nasa hle a, tun hnai khan Assam Finance Minister Himanta Biswa Sarma chuan Congress sorkar thil tih dik tawk loh vang niin a sawi a, Raha khaw mipuite thil phut chu a hriat thiampui thu a sawi.

Meeting-a tel te chuan an ngaihdan hrang hrang an sawi a, buaina chu tharum hmang loa chin fel an duh tih an sawi hlawm. Hmalak zel dan tur an rel a, an harsatna tawh chu state sorkar kutah dah loa sorkar laipui chinfel tir an duh thu an sawi bawk. He hunah hian Additional Chief Secretary Rajib Bora, Commerce and Industry Minister Chandra Mohan Patowary, Water Resources Minister Keshab Mahanta, MLA, Chief Secretary VK Pipersenia, bakah AIIMS Demand Committee member mi 19 te an tel a ni.