October-ah NRC tlangzarh dawn

Sorkar laipui chuan Thawhlehni khan Assam-a kalpui mek National Register of Citizens (NRC) chungchang-ah hriattirna a chhuah. State sorkarin NRC a kalpui mek chu October khian tlangzarh tura tih a ni a, hei hi endik leh a nih hnuah January 2017 khian final a ni ang.

Assam-ah hian thla eng emaw zat chu NRC hi kalpui a ni tawh a, document lem leh thil fel lo tam tak a awm avangin hna hi chak taka kalpui a harsat thu thuneitute chuan an sawi. A bikin ṭhenawm ram Bangladesh aṭanga dan loa lut leh khawsa eng emaw zat te chuan document lem hmangin NRC-ah hian inziah luh an tum a, hnathawktute chu fimkhur tura chah an ni fo bawk. Pawl hrang hrangte chuan NRC-ah hian ram leilung fa dik tak chauh ziah luh an duh tih an lo sawi tawh a ni.

Minister of State for Home Affairs Kiren Rijiju chuan NRC kalpui mek chu Lok Sabha-ah sawi chhuakin, 97% zawhfel a ni tawh a nih tawh thu a sawi. Assam NRC State Coordinator chuan application form 68,08,232 an dawng tih a sawi a, offline leh online hmanga document an dawn zawng zawng chu vaibelchhe 6.73 a ni, a ti. Hna hi 97% zet zawh fel tawh a ni a, document endik hna hna hi thawh mek zel a ni a, zawh fel thuai beisei a ni. Supreme Court chuan National Register of Citizens kalpui mek chu peih fel thuai turin state sorkar chu a lo hriattir tawh bawk.