Pema Khandu-a'n fiahna paltlang

Arunachal Pradesh Chief Minister thar Pema Khandu-a kaihhruai Congress sorkar chuan Assembly-ah fiahna a paltlang a, MLA 46 te chuan Chief Minister thlawpin, Bharatiya Janata Party (BJP) MLA 11 te chuan an thlawp lo thung.

Governor Tathagata Roy chuan Assembly-ah Khandu hian thlawptu a ngah tawk em tih tichiang tura floor test nei turin a hriattir a, Nilaini zan khan floor test hi neih a ni. Deputy Speaker Tenzing Norbu Thongdok chu inkhawm hi kaihruaiin, CM Pema Khandu chuan motion a pu lut a, CM hlui Nabam Tuki, Congress MLA 44 leh Independent MLA 2 te chuan an thlawp a ni.

Khandu chuan MLA leh chief minister hlui pahnih Nabam Tuki leh Kalikho Pul ten an thlawp avangin lawmthu a sawi. Khandu chuan House member-te chu an intluktlang tur a ni a ti a, eptu party-te enhran bik a duh loh thu a sawi bakah an state chhunga hnam hrang hrangte intluktlanna chu a ngaih-pawimawh thu a sawi bawk. A thupui ‘Team Arunachal’ chu vawng nung turin
ṭanrual a ṭul thu a sawi a, scheme hrang hrang tihlawh-tling tura mahni chanvo ṭheuh hlen chhuak thei turin House member-te chu a chah.

CM hian Thawhlehni khan Itanagar-a State Civil Secretariat Building tlawhin, security system thuam ṭhat dan tur te a enfiah a ni. Chief Secretary Shakuntala Gamlin, Deputy Chief Minister Chowna Mein, MLA Kumar Waii, Lombo Tayeng, Phosum Khimhun, Thangwang Wangham leh sorkar mi pawimawh ten an ṭawiawm. Secretariat-ah hian security tih chak nan Door Frame Metal Detector, X-Ray Scanning Machine te dah belh a ni dawn a, Radio Frequency Card bakah Biometric system hman a ni dawn a ni. DONER Ministry sum hmanga sak Secretariat Building thar hi August 15, 2016 khian hawn tura tih a ni.