Tuilianin Arunachal tibuai

Tun hnaia hmarchhak state ten tui lian avanga harsatna an tawh mek chuan ziaawm lam a la pan thei meuh lo a, Arunachal Pradesh chuan tuilian vang hian harsatna a tawk chho ve leh mek. Namsai district chu tuilian hian a chim tawh a ni.

Noadihing lui lian chuan thingtlang khua Namsai, Lekang leh Piyong te chu a chim tawh a, an thlai chinna hmun pawh tuilian hian a chimpil vek tawh a ni. Silatoo, Mahadevpur-I, Mahadevpur-III, Maha-devpur-IV leh Dirak Mir-ah te relief camp siam a ni a, himna zawnga in leh lo chhuahsan mi eng emaw zat an khawsa mek. National Research and Development Foundation (NRDF) te chuan chhun zan zawmin tuilian avang harsatna tawkte chhan-chhuah hna an thawk a ni.

Chief Minister Pema Khandu chuan tuilian avanga harsatna tawkte chhawmdawl dan tur ngaihtuah a nih tur thu a sawi a, Deputy Chief Minister Chowna Mein chuan tuilianin a tih buai mek Namsai district chu a hmuna kalin hma-lak dan tur a enpui tawh bawk. Namsai Deputy Commissioner R.K.Sharma chuan chenna neuilite awmna turin relief camp sak belh mek zel a ni a ti. Namsai MLA Chow Zingnu Namchoom chuan an harsatna tawh mekah hma lakpui turin CM Khandu chu ngenin, chhawmdawlna awm thei angte pe turin a ngen. Tuilian avang hian nunna chan leh hliam tuar an awm hriat a la ni lo.