World Heritage List-ah KNP

Sikkim-a Khangchendzonga National Park (KNP) chu India rama a hmasa ber leh awm chhun ni turin United Nations Educational, Scientific and Cultural Organization (UNESCO) chuan “Mixed World Heritage Site”-ah a puang.

UNESCO chuan World Heritage List Criteria-ah KNP hi Natural leh Cultural Heritage-ah a tling ve ve niin a sawi. Tun hnai khan UNESCO World Heritage Committee chuan Istanbul, Turkey-ah meeting an nei a, Committee chuan KNP hi UNESCO World Heritage List-ah telh a remti ta a ni. UNESCO World Heritage Committee-ah hian member 21 an awm. International Union for Conservation of Nature (IUCN) leh International Council on Monuments and Sites (ICOMOS), bakah UNESCO Advisory Bodies te chuan Khangchendzonga National Park (KNP) hi ‘Mixed World Heritage Site’-a telh turin rawtna an lo siam tawh a ni.

KNP hian ram a nei ṭha hle a, ramsa leh thil nung chi hrang hrang 178,400 vel zet an awma ngaih a ni. Khawvela thlang chhip sang ber pathumna Mt. Khangchendzonga hming chawia phuah a ni. KNP hi Himalaya Global Biodiversity Hotspot huam chhunga awm a ni a, dil eng emaw zat a awm bakah km 26 zeta thui Zemu Glacier a awm bawk. Sikkim state zau zawng 25% chu KNP hian a awh a, ramsa mang mai thei, hnute ringa khawsa, thing leh pangpar chi hrang hrang a tam hle a, China-a Three Parallel Rivers of Yunnan Protected Areas lo vekah chuan a lian ber te zing a mi a ni.

Khangchendzonga National Park hian Tibetan Buddhist-te tan sakhuana kawngah pawh pawimawhna thuk tak a nei niin an sawi. A ram pian hmang danglamna te, a leilung mawina te chuan mipui a hip hle. Tibetan Buddhist bakah hian Mayel Lyang, Lepcha te chuan sakhuana kaihhnawiha an hmang
ṭangkai hle bawk. World Heritage List-a lang phak India hian 35 zet a nei a, heng zinga pasarih te chu Natural niin 27 chu Cultural a ni a, Khangchendzonga National Park hi Mixed-ah awmin, India rama a awm chhun a ni.