SC-ah Tripura sorkar a zualko dawn

Tripura sorkar chu a hnathawkte Dearness Allowance (DA) a pek dan chungchanga Tripura High Court thupek avangin Supreme Court-ah a zualko dawn tih State Finance Minister Bha-nulal Saha chuan a sawi.

Tripura High Court chuan state sorkar chu a hnathawkte leh pensioner-te DA chu 42% a tipung turin a hriattir. Central hnuaia hnathawkte DA chu 125% ah tihpun a ni. Finance Minister Bhanulal Saha chuan sorkar hnathawkte DA chu 1% lek pawha tihsan a nih chuan state sorkar sum hloh tur chu cheng vaibelchhe 33 a ni a ti a, 42% ah tihsan a nih chuan kum tin state sorkarin DA-ah vaibelchhe 1,386 a hman a ngai dawn a ni tiin, chu chu sorkar tan thil theih loh a ni a ti. State sorkar hnuaia hnathawkte chu DA chungchangah hian Tripura High Court-ah an zualko a, Court chuan state sorkar chu DA tihkhawtlai awm te pe chhuak turin a lo hriattir tawh a ni.

State sorkar chuan a hnathawkte DA a hrensak chu pek chhuah vek a nih chuan hmasawnna hnathawh mek ṭhen-khat chu tihtawp a ngaih dawn bakah sum leh paiah harsatna nasa tak an tawk thei dawn niin a sawi. Sorkar kum 2015-16 chhunga sorkar hnathawkte DA atana sorkar laipui aṭanga sum hmuh chu vaibelchhe 500 vel a nih thu sawiin, 2016-17 chhungin vaibelchhe 1,100 hmuh beisei a ni a ti a, DA tih pun chu thil harsa tak a ni Saha chuan a ti. State sokarin sum a dawn tur chu pek tlak loh a la awm thu sawiin, Seventh Central Pay Commission hman a nih hnuah DA tihpun chungchang chu state sorkar chuan a ngaihtuah dawn chauh niin Finance minister chuan a sawi bawk.