Hmarchhak state duhsak an ni: Jaitley

Parliament fur ṭhut-khawm neih mekah, Thawhlehni khan Union Finance Minister Arun Jaitley chuan hmarchhak state-te chu 14th Finance Commission hnuaiah state dangte aiin duhsak bik an ni, a ti.

Jaitley chuan hmar-chhak state te harsatna chu sorkar laipui chuan a hriatpui thu sawiin, 13th Finance Commission aiin 14th Finance Commission-ah sum tam tak hmanga duh sak bik an nih thu a sawi. Hmarchhak state-te chu sum tam zawka vur an ni a ti a, state dangte aia a sanna chu 32% lai a ni, a ti.

Rajya Sabha-a Zero Hour hmanah hemi chungchang hi Union Finance Minister chuan a sawi chhuak. Assam Congress MP, Ripun Bora chuan 14th Finance Commission hnuaia state tinte sum pek chhuah danah Union Finance Minister hi zawhna a zawt a ni. Jaitley chuan hmarchhak satte te chu `Special Category State’ status pek an ni a ti.

Hetih lai hian National Green Tribunal (NGT) in hun rei tak chhung Meghalaya-a Coal Mining te a khuahkhirh avangin Hindustan Paper Corporation chuan harsatna a tawk mek tih tarlan a ni. Minister of Heavy Industries and Public Enterprises Babul Supriyo chuan Cachar Paper Mill chuan lungalhthei duh anga hman tur a neih loh avangin sum tam tak an hloh tih sawiin, sorkar laipui chu Paper Mill a tluk chhiat mai loh nan leh dan pangngaia hna thawh chhunzawm a nih theih nan sum hmanga
ṭanpui turin a ngen sak. NGT hian nikum aṭang khan Maghalaya-ah hian lungalhthei aṭanga chhiah pek dan leh an rama lui tui nasa taka tihbawlhlawh a nih vangte, dan loa mimal lungalhthei khur nei eng emaw zat an awm avangin khuakhirhna dan a lek mek a ni. Hei vang hian hun rei tak chhung chu Meghalaya chuan lungalhthei a thawnchuak tawh lo a ni.