AGP aṭangin a dintu zinga mi a bâng

Asom Gana Parishad (AGP) dintu zinga mi leh Assam minister hlui, Pabindra Deka chu Thawhlehni khan AGP aṭangin a bang. 

Deka hi Patacharkuchi constituency aṭanga AGP MLA a ni a, Assam-ah hian AGP leh BJP hian ṭangrual sorkar an siam mek a ni. 

Citizenship (Amendment) Act na taka a dodalna chu an party hruaituten an ṭawmpui loh avangin AGP aṭangin a bang tih Deka chuan a sawi. "Nikuma Parliament-a Citizenship (Amendment) Bill (CAB) pharh a nih khan AGP chu a ngawi reng a, party Rajya Sabha MP neihchhun Birendra Prasad Baishya chuan vote laknaah he bill thlawp lamah hian a vote zui a ni," a ti. An party chhungah amah chauh chuan CAB/CAA chu a duh lo nia sawiin, langsar takin a duh loh thu pawh hi a tlangaupui fo tih a sawi. Hei vang hian party hruaitu pawhin a khak hial tih a sawi a ni. 

AGP hruaitu ho na hnuaiah chuan an him tawk lo nia sawiin, a awm zui zel thei tawh lo tih a sawi. Eng party nge a zawm dawn tih a la tifel lo tih a sawi a, kum 2021 assembly inthlanah chuh leh ngei a tum tih a sawi bawk. 

Hetih lai hian report ṭhenkhat chuan Deka hian All Assam Students' Union (AASU) leh Asom Jatiyatabadi Yuva Chhatra Parishad (AJYCP)-ten political party an din thar, Assam Jatiya Parishad (AJP) zawm a tum niin an tarlang. 

Dekha hi AGP dintu zinga mi niin, kum 1985-1990-a Prafulla Kumar Mahanata kaihhruaia AGP in sorkarna an siam hmasak berah khan cabinet minister a ni. Patacharkuchi constituency aṭang hian term thum, 1985, 2001 leh 2016 ah AGP MLA atan thlan tlin a ni tawh bawk.