Special Category Status sawifiah turin BJP phut

Assam Assembly Budget Session neih mekah tun hnaia local newspaper-a hmarchhak state-te Special Category Status hlihsak an nih thu an tarlan chungchang sawi fiah turin Opposition party, Congress chuan rorel lai BJP kaihhruai sorkar a phut.

Congress MLA Rakibul Hussain chuan Question Hour-ah zawhna siamin, Finance Minister Arun Jaitley-a'n sorkar laipuiin Assam leh hmarchhak state dangte Special Category Status a pek ṭhin chu titawp a nih tur thu a sawi nia tarlan chu sawifiah turin rorel lai BJP a ngen. Assam Finance Minister Himanta Biswa Sarma chuan NDA kaihhruai sorkar hnuaiah hmarchhak state-te Special Category Status pek an nihna chu hlih a la nih loh thu sawiin, state sorkar chu kum hnih chhungin sorkar laipui aṭanga ṭanpuina cheng vaibelchhe 58,016.42 pek an nih thu House a hrilh. Parliamentary Affairs Minister Chandra Mohan Patowary chuan Congress MLA zawhna chu chhan mai theih loh niin a sawi ve thung a, sawiho ngai niin a sawi. Speaker Ranjeet Kumar Das chuan sawiho leh atan a dah zui ta a ni.

Congress MLA te chu te chu Speaker thutlukna avang hian an lungawi lo hle a, House aṭangin an chhuak tau. Congress MLA Rakibul Hussain chuan, "Speaker hian eng vangin nge Minister insawihfiahna chiah a ngaihthlak a, sawi zui a phal leh si loh, Special Category Status chungchang hi thil pawimawh tak a nih avangin House-ah sawiho kan phut a ni" a ti. Minister Himanta Biswa Sarma chuan, sorkar laipui scheme tam zawkah chuan hmarchhak state te tan 90:10 leh 80:20 funding pattern mode hman a la nih reng niin a sawi. Special Category State status chu a hming chauh thlak a nih bakah, hmarchhak state-te chuan a hma ang thoin kawng hrang hranga duhsakna leh hamṭhatna an dawn ṭhin chu an la dawn reng thu a sawi a ni. Karleh Thawhṭan khian House-ah 2016-17 Budget pharh a nih tur thu State Finance Minister Himanta Biswa Sarma chuan a sawi.