Manipur Tribal ten Bill boycott turin Congress ngen

Joint Action Committee against Anti-Tribal Bills (JACAATB) Chura-chandpur leh Outer Manipur Tribal Front (OMTF) te chuan ‘anti-tribal’ bills chu boycott ngam turin Congress party an ngen.

JACAATB leh OMTF te hian Imphal-ah joint meeting an nei a, rorel lai Congress party chu Manipur Legislative Assembly-in August 31, 2015-a ‘anti-tribal’ bills a pass takte chungchanga hmalatu an ni tiin, an hmalakna chu tawpsan tura an duh thu an sawi. An thuchhuah chuan Congress party chuan tribal area-ah hmalakna engmah a kalpui tur a ni lo a, an party office zawng zawng pawh khar sak vek an ni ang. Political party eng pawh, national an ni emaw regional party pawh nise tribal-te hma-khua ngaihsaktu tak tak lo tan hmun a awmlo niin an sawi. Heng bakah an harsatna chu sorkar laipuiin a chinfel sak loh chuan Independence Day an boycott tur thu an sawi bawk.

OMTF leh JACAATB te hian ‘anti-tribal’ bills chungchangah hian state sorkarah memorandum thehluh an tum tih sawiin, an harsatna tawh mekah state Governor leh sorkar laipui dawr an tum a, tribal MLA leh MP te chu an hmalakna thlawp vek turin an ngen bawk. Pawl pahnih te hian kum tin August 31 chu “Tribal Unity” day atan hman an rel bawk a ni.