Gorkha hruaituin ‘Marathon March’nei

Gorkha Autonomous Council Demand Committee (GACDC) Chairman Harka Bahadur Chetry chuan tharum thawh loa Gorkha te dikna leh chanvo humhim zel a nih theih nan “Marathon March” a nei a, July 19 khan Dhemaji district-a Jonai aṭanga bul ṭanin Dispur a pan.

Bahadur Chetry hian km 560 zeta thui tlan turin ruahmanna a siam a, ni khatah km 30-50 tlan a tum a, August 1 khian Guwahati a thleng ang. Chetry chuan “Marathon March” a neih chhan sawiin, Gorkha te chuan National Register of Citizens (NRC) kalpui mekah en hran leh tih bik an nih thu a sawi a, hei hi India khua leh tui nihna inrahbehsak tumna a ni, a ti. NRC kalpui dan chuan fundamental rights a kalh niin a sawi bawk.

July 19 khan a bul ṭan nan tlan ṭanin amah thlawptu mi
ṭhahnem takin an thlawpna lantirin an telpui a, Gorkha ṭhahnem takin kawngpuia amah an thlawpna an lo lantir ve bawk. Thlawptu zingah hian hmeichhia leh school naupang leh pawl hrang hrangte an tel a, hmun tam takah eitur an lo buatsaih sak bawk. Chetry hian nitin zing dar 6 aṭang tlan ṭanin zan dar 6 thleng a tlan ṭhin dawn a, August 1 khian Guwahati-ah a kharna hun hman a ni ang.