Tripura-in sorkar laipui puihna a ngen

Tripura panna kawngpui pawimawh National Highway chu lirthei kaltlang theih loha a awm mek avangin Bangladesh kaltlangin nitin mamawh lakluh a la ni. Assam-Agartala inkar National Highway hi thla thum chuang zet chu khar a ni tawh.

State Food and Civil Supply Minister Bhanulal Saha chuan kawngpui tlang hun tur hriat ala nih loh thu sawiin, sorkar laipui chu Bangladesh kaltlanga tui leh khawmual aṭangtea bungrua thawnlut tura a duh thu a sawi. An harsatna tawh mek chuan zual lam a pan zel avangin sorkar laipui chu hma la turin minister chuan a ngen a ni. Tun hnai khan National Highway Infrastructure Development Corporation, PWD department leh Assam thuneitute nen hemi chungchangah hian meeting an nei a ni.

Saha chuan Ministry of Railways-ah an harsatna tawh mek chu thlen a nih tawh thu leh, chhanna an la dawn loh thu a sawi. Tripura PWD Minister Badal Choudhury pawhin an harsatna tawh chungchangah Assam minister Parimal Suklabaidya chu a titipui tawh thu a sawi.

Tripura pana tlan oil phur tanker 1,000 te chu kawngah hian an la tangkhang mek. Kawngpui hi July thla tir lam khan ni reilo te lirthei kaltlang theiin a awm a, mahse ruahtui a tlak belh zel avangin kawng hi a ping leh tawh a ni.

Hetih lai hian Union Road Transport and Highways Minister Nitin Gadkari chuan Nilaini khan ministry official technical team te chuan National Highway siam ṭha tur hian Tripura an pan tih a sawi. Tripura MLA pathum te chuan minister Gadkari hi an harsatna tawh meka hmalakpui turin New Delhi-ah an hmu a ni. He hunah hian Road Transport and Highways Ministry Secretary Sanjay Mitra pawh a tel a ni. MLA te chuan NH chu hmarchhak state te chakkhai lam khawmna bulpui ber a ni an ti a, hun rei tak chhung harsatna an tawh tawh thu hi Union minister hnenah hian an thlen. Hmarchhaka rel tlan tir ni ve bawk mah se chhan hrang hrang vangin tihtawp lailawk a ni fo tih an sawi bawk. An harsatna tawh mek chu hriatthiampui a, hma lakpui turin Minister hi an ngen a, a ni pawhin hmalakpui a lo tiam.

Tripura hian NH kaltlang theih loha a awm mek avang hian harsatna an tawk nasa hle a, nitin mamawh duh anga an hmuh theih loh bakah thil man a to chak em em a ni. Mamawh zualpui, buhfai, oil leh thil dangte chu ṭhenawm ram Bangladesh kaltlanga lakluh a ngai hial a ni.