Arunachal leh Assam ten tuilian tuar mek
Tun hnaia ruahsur nasa tak avangin Arunachal Pradesh leh Assam te chuan tuilian an tuar mek a, leimin vanga inkalpawhna chhia chuan mipui nawlpui nunphung a tibuai hle.
AP-ah chuan East Kameng district-a khaw eng emaw zat chu tlawhpawh theih lohin an awm mek a, kawngpui chhia a tam avangin lirthei luh theih hun tur hriat a ni lo. Anchal Samiti chairperson Renu Kino chuan an harsatna tawh chu a namai lo hle tih sawiin, mipuiten nitin mamawh lakkhawm kawngah harsatna an tawk mek a ni, a ti. Subansiri district-ah chuan leimin leh tuilian avang hian dil eng emaw zat chu a chhe tawh tih tarlan a ni. Leimin nasa tak avangin sorkar building leh mi mal in eng emaw zat chu dinhmun hlauhawm tak an awm mek a, ranvulh thi a awm nual tawh bawk.
Report-a tarlan a nih dan chuan electricity line chhia avangin khaw tam tak chuan eng an hmu thei lo a, inbiakpawhna a mumal lo hle. Durra Nala micro hydel project kalpui mek chu chawlhsan lailawk a ni bawk. Pasighat-a Siang lui chuan hlauhawm chhinchhiahna a pel tawh. Tuilain avang harsatna tawkte chhanchhuah hna hi Disaster Management Deptt, NDRF leh mi tlawmngaite chuan an thawk reng a ni. Mi 4,000 vel zet chuan an chenna hmun an chhuahsan tawh nia tarlan a ni a, heng mite hi relief camp hrang hrangah an khawsa mek. Relief Camp hi 200 chuang zet siam a ni tawh.
Leimin nasa tak avangin National highway 52 chu khar rih a ni a, a thenfai hna thawh nghal a ni, tuilian avangin a dinhmun a ṭha lo hle bawk. Tuilian hian thlai chinna hmun hectare 2,500 vel zet a chim tawh a ni. Dy Chief Minister Chowna Mein leh MLA te chuan tuilenna hmun leh relif camp hrang hrangte an tlawh a, chawmdawlna pek dan tur an ngaihtuah a ni. Sangha mantute chu che chhuak rih lo tura hriattir an ni a, mipuite pawh an tui hman fimkhur tura chah an ni.
Assam-ah mi nuai nga
chuangin tuilian tuar
Assam-ah tuilian tuar an pung zel a, tuilian avanga harsatna tawk hi mi nuai nga chuang an tling tawh nia tarlan a ni.
Lakhimpur, Golaghat, Morigaon, Jorhat, Dhemaji, Sivsagar, Kokrajhar, Barpeta, Bongaigaon leh Chirang te chu a tuar nasa zual an ni. Sipaite chuan Chirang district-ah dinhmun ṭha lo taka awm mi 30 zet an chhanchhuak. Assam State Disaster Management Authority (ASDMA) official chuan tuilian avanga harsatna tawk hi mi 5,02,813 vel zet an nih thu sawiin, khaw 1,039 te chuan harsatna hi an tawk a, hmun hrang hranga thlai chinna hmun tuilianin a chim tawh chu hectare 46,680.24 vet zet niin a tarlang. Relief Camp 70-ah mi 21,549 vel zet an khawsa mek a, himna zawnga in leh lo chhuahsan hi an la punbelh zel rin a ni.
Tuilian hian hmun tam takah inkalpawhna lei a tichhe tawh a, inkalpawhna a buai phah hle. Inkalpawhna a buai avang hian chhanchhuah hna thawktute chuan harsatna an tawk. Zirtawpni khan Army team te chuan Chirang district-a khaw pakhatah aṭangin lawng hmangin mi 30 an chhanchhuak a, heng mite dinhmun hi a ṭha lo hman hle tih an sawi. Tezpur-a Army Flood Control Centre chu chhun zan zawma hawn a ni a, a ṭulna lam apiangah an che chhuak ṭhin.
Assam-a tuilian hian Kaziranga National Park leh Pabitora National Park hmun ṭhenkhat chu a chim tawh nia tarlan a ni a, Brahmaputra lui chu Guwahati leh a chheh velah a chim chin a la san belh zel bawk. Lakhimpur leh Morigaon district-ah chuan tuilian avang hian mi pahnihin nunna an chan tawh a ni.