NELP bulṭantu chu Congress: Patowary

Assam Commerce and Industries Minister Chandra Mohan Patowary chuan Zirtawpni khan New Exploration and Licensing Policy (NELP) chu Congress sorkar hun lai, kum 1992-a bulṭan a ni a ti a, kum 1998-2012 chhungin state chhunga oilfield 20 zet chu lilam a nih thu a House a hrilh.

Congress MLA Ajanta Neog leh AGP MLA Ramendra Narayan Kalita te zawhna chhangin, Patowary chuan oilfield te chu mimal leh company kutah hlan ni mah se state-in harsatna a nei dawn lo niin a sawi. Minister chuan oil lakchhuah kawngah te, chhiah lakdan leh hna-thawktu chungchangah te harsatna tur a awm lo a ni, a ti. Foreign private company te hnena land rights chu kum thum atan chauh pek an ni ang, a ti bawk.

Sorkar laipui chuan Assam-a oilfield te chu mimal emaw company emaw kuta dah turin state sorkar a hriattir. Hei hi mi tam tak chuan chuan dodalin oilfield te chu lilam lo tura an duh thu an sawi bakah, sorkar thupek chu sut leh tura an duh thu an au chhuahpui a ni. Pawl hrang hrangte chuan oilfield te chu OIL leh ONGC kuta dah an duh thu an sawi. Hetih lai hian Patowary chuan OIL leh ONGC te hian lilam an chhang thei dawn niin a sawi.