Assam Expert Committee ten China pan dawn

World Bank sum hmangin Assam Expert Committee te chuan China an pan dawn a, flood management systems an kalpui dan an zir chiang dawn a ni.

Assam sorkar chuan tuilian avanga harsatna an tawh ṭhin sutkianna tura hmalakna atan World Bank aṭang hian sum puk turin hma al a mek a ni. China sorkarin a lui lian Hwang Ho a enkawl dan leh tuilian laka a him theih nana a cheibawl dan zir tur hian expert committee te hi tirh an ni dawn a, Brahmaputra-ah hman ve dan an ngaihtuah dawn a ni. Assam Chief Minister Sarbananda Sonowal leh World Bank te chuan hemi chungchangah hian Zirtawpni khan Guwahati-a Chief Minister office chamber-ah meeting an nei a ni.

Sonowal chuan tuilian avanga harsatna an tawh ṭhin sukiang tura hmalakna kawngah World Bank te nen an thawkho thei chu lawmawm a tih thu a sawi. Sonowal chuan mipuite rilrua Brahmaputra luiin a chhe zawnga hmun a luah ṭhin titawp turin hma an la mek a, nakinah chuan mipuite hlimna thlentu leh hausakna hnar ala nih tur thu a sawi. Brahmaputra luiah hian kum tin thahlum an awm ziah a, fur laia a len ṭhin bawk avangin chhiatna a thlen ṭhin a, thlai chingtute beidawngin a siam fo bawk a ni.

CM chuan Assam Flood Erosion and River Management Modernisation Project atan sorkar chuan cheng vaibelchhe 1500 a ruahman thu a sawi. Project hi World Bank sum hmangin kalpui a ni dawn a, hna thawh ṭan a nih hmain China-ah Expert Committee tirh hi an rel ta a ni.