Modi-a'n Delhi-Agartala Train Service vailiam dawn

Prime Minister Naren-dra Modi chuan July 31 khian Agartala-ah Delhi-Agartala rel service hawnna hun a hmang dawn a, rel tlan hmasa ber tur chu a vailiam ang. He hunah hian Railways Minister Suresh Prabhu bakah Tripura Chief Minister Manik Sarkar leh Minister of State for Railways Rajen Gohain te chu tel tura beisei an nih thu Tripura Transport Minister Manik Dey chuan a sawi.

Delhi-Agartala rel service tur hi a hmingah ‘Tripureswari Super Fast express' tih a ni ang. Railways Minister Suresh Prabhu chuan hemi ni vek hian Agartala (Tripura) – Akhaura (Bangladesh) railway service lungphum a phum nghal dawn a ni. Ram pahnih te hian Akhaura-Agartala rel kawng siam tur hian Bangladesh Prime Minister Sheikh Hasina-in January 2010-a New Delhi a tlawh ṭum khan inremna an lo siam tawh a ni. Tripura Transport Minister Manik Dey, Chief Secretary Yaspal Singh leh NFR Chief Engineer Harpal Singh te chuan Inrinni khan Agartala railway station chu a hmunah kal chilhin, Delhi-Agartala rel service tur hi an enfiah a ni.

Hemi chungchangah hian Tripura MP pathum Jitendra Chowdhury, Sankar Prasad Datta leh Jharna Das Baidya te chuan Zirtawpni khan Railways Minister Suresh Prabhu chu New Delhi-ah an kawm a, India-Bangladesh railway project kalpui tur chungchang an sawipui. India-Bangladesh railway project atan hian cheng vaibelchhe 968 ruahman a ni a, India External Affairs Ministry leh Development of North Eastern Region (DoNER) ministry te chuan an intum sem dawn a ni. DoNER hian veibelchhe 580 a tum dawn a, vaibelchhe 150 chu a pechhuak tawh. Agartala-Akhaura railway project hi peih fel a nih hunah chuan India hmarchhak leh Bangladesh te chuan insumdawn tawnna lian tham zawk an kalpui theih beisei a ni.