House-ah samak chungchang sawichhuak

Kum 2001-2016 chhungin Assam state-ah sapeltute kutah samak 239 zet an thi a, heng zinga 161 te hi Kaziranga National Park ami an ni tih Assam Assembly Budget Session neih mekah tarlan a ni.

Congress MLA Ajanta Neog chuan hemi chungchangah hian zawhna a siam a, State Forest Minister Pramila Rani Brahma chuan kum 15 chhungin samak 239 thah an nih thu leh, sapelnaa inhnamhnawih mi 661 man an nih thu a sawi. Samak thah zinga 161 te chu Kaziranga Park ami an ni a, Orang National Park-ah 34, Pabitora Wildlife Sanctuary-ah 15, Manas National Park-ah pakua te thah an ni. A bak 20 te chu hmun hrang hrang ami an nih thu Minister chuan a sawi.

Kumin January chhungin Assam-ah hian samak 15 thah an ni a, heng zinga 12 te hi Kaziranga Park ami an ni a, Manas leh Sonitpur-ah te pakhat ve ve thah an ni bawk. Brahma chuan Kamalakhya Dey Purkayastha zawhbelhna chhangin, tun hnai kum nga chhungin mihring leh ramsa inbeihna avangin mihring 386 leh ramsa 43 zet thi an awm thu a sawi bawk.

Assam-ah hian kum 2011 chhung khan mi 68 in ramsa lakah nunna an chan a, mi 83 te chuan kum 2012 chhung khan nunna an chan leh bawk. Kum 2013 khan nunna chan hi pungin mi 85 an thi a, kum 2014-ah erawh chuan mi 54 ah a tlahniam thung. Kum kalta 2015 kha ramsa nena inbeihna avanga thi an tam ber ṭum niin mi 97 te chuan nunna an chan a ni. Thi zinga a tam zawkte hi Sonitpur, Udalguri, Nagaon leh Baksa district amite an nih thu Minister chuan a sawi bawk. Mihring an beih avanga ramsa tihhlum zingah hian sai 11 leh keite 32 an tel a ni. Minister chuan ramsa ṭhenkhat chuan mihring an bei fo ṭhin tih sawiin, mihring tana hlauhawm ramsa eng emaw zat chu tihhlum an ni tawh a ni, a ti. Ramsa avanga nunna chan an pun chhoh zel avangin venhimna uluk zawka kalpui a nih tur thu State Forest Minister Pramila Rani Brahma chuan a sawi bawk.

Hetih lai hian Assam Police te chuan samak kaptu mi panga te chu Pathianni khan an man leh. Sapeltute hi Biswanath district-ah man an ni a, police te chuan an kut aṭang hian samak ki hralh tura an lak chu an man tel bawk. An zinga mi pali te hi Gohpur-ah man an ni a, pakhat hi Sootea-ah man a ni. An samak ki man rih zawng hi gm 650 gm a ni a, international market-ah chuan cheng vaibelche 1.5 man vel niin an sawi. Police te chuan an mi man te chu Sukur Ali, Sehar Ali, Momin Ali leh Babul Ali te an nih thu an sawi.

Biswanath district Superintendent of Police Ankur Jain chuan tun thla hnih kalta chhunga sapeltute dap chhuah beihpui thlaknaah mi 25 man an nih tawh thu sawiin, an kut aṭang hian silai leh a mu ṭhahnem tak man tel a ni,a ti. An mi mante chu hmun hrang hrang ami an nih thu sawiin, mi panga an man te hi Gohpur police ten beihpui an thlaknaa an man a nih thu a sawi bawk.