Manipur cabinet Siksawi duh loin nawrh hauihawt

Manipur chief minister N Biren Singh chuan kar liam ta khan a cabinet a siksawi a, minister ṭanglai paruk a ban a, mi thar panga a lalut. Minister ban zingah hian BJP kaihhruai ṭangrual sorkara hmeichhe minister awm chhun, Nemcha Kipgen ban tel a ni a, hei hi duh loin Kongkokpi district headquarters-ah nawrh huaihawt a ni. 

Nute Kailhang (Women's Market)-ah nawrh hi huaihawt a ni a, CM Singh-a lim an hal bakah, BJP chu inthlan dawna an election manifesto-a state chhunga hmeichhiate thuam chakna tura a intiamna phatsanah an puh bawk. 

Nawrh huaihawtte hian hmeichhe minister awmchhun ban a ni chu an dem takzet tih sawiin, N Biren Singh kaihhruai BJP sorkar chuan Manipur-a  hmeichhiate chanpual neihte chu tichhiain, hmeichhiate tana hun ṭha awm ve tur pawh a dan chah sak a ni, an ti. 

Kuki Women Union Sardar Hills (KWUSH) general secretary Hethem Kipgen chuan minister aṭanga Nemcha Kigpen ban a ni chu  state chhunga hmeichhiate dahhniamnaa an ngaih thu sawiin, an ngaithiam lo hle tih an sawi. BJP-in hmeichhiate thuam chak a, Parliament leh state Assembly-a hmei­chhe chanpual, 33% dah chu a taka kalpui an lo tiamna chu thil awmze nei lo mai a ni, tiin a sawi. Kalkhawmte chuan Kigpen chu council of minister-ah dah let leh ngei an phut tih an sawi a ni. 

CM Biren Singh-a ministry siksawi chung changah hian ṭangrual sorkara BJP thawhpui, National People's Party (NPP) leh JJP pawh an lawm lo  hle. CA&D minister hlui leh JJP hruaitu, Karam Shyam chuan an party chuan central lama an party hruaitute nena meeting an neih hunah, BJP kaihhruai sorkar an thlawp chhunzawm dawn leh dawn loh an ngaihtuah dawn tih a sawi. Shyam chuan, "Cabinet aṭanga ban nih hi ka rilru a na a ni lo a, mahse engmah inhriattirna awm loa in ban ngawt hi ṭangrual sorkar kalphung tur a ni lo," a ti. 

NPP MLA palite pawh Inrinni khan an president Conrad Sangma hmu turin Meghalaya an pan. Minister aṭanga ban zingah NPP minister pahnih an tel a ni. NPP team hi deputy chief minister Y Joykumar Singh-a'n a ho a, Shillong an pan hmaa media mite a kawmnaah, "Party president kan hmuh hunah kan awm zel dan tur chu kan ngaihtuah dawn a ni," tih a sawi.