Tripura-ah journalist pahnih kut thlak

South Tripura district-ah kar liam ta Zirtawpni khan journalist pahnih chu mi ṭhenkhatin bazar an suasam lai thla an lak avangin kut thlak an ni. 

Tualchhung chanchinbu pakhata reporter Samir Kanti Debnath leh TV journalist Suma Nag-te chuan  Barpathari bazar-a dawr suasam lai hi hmuin, thla an la a, heng misualte hian anni pahnih chu an rawn sawisa zui tih an sawi. Puratan Rajbari police station-ah FIR an thehlut nghal a ni. 

Tripura Working Journalists Association (TWJA) leh Tripura Assembly of Journalists (TAJ) chuan he thil thleng hi an dem thu sawiin, pawikhawihtute chu man thuai tura an phut thu an sawi. 

TAJ chuan thuchhuah siamin, September 11-a chief minister Biplab Kumar Deb-a'n South Tripura district-a Sabroom hmuna journalist-te chungchang huatthlalaawm taka a sawi hnuah  state chhung hmun hrang hrangah journalist parukin kut an tuar tawh a ni, a ti. 

CM Deb hian an state-a special economic zone hmasa ber tur lungphum a phumnaah,  chanchinbu ṭhenkhat chuan hri leng chungchanga sorkar hmalak danah thu dik tawk lo chhuahin mipui rilru tihbuai an tum a, heng mite hi a ngaidam ngai dawn lo a, Tripura mipuite pawhin an ngaidam dawn lo a ni, tiin a sawi a ni.