Kum 16 hnuah Sharmila-i'n chaw nghei titawp dawn ta

Manipur 'Iron Lady' Irom Sharmila chuan kum 16 chhung zet an state aṭanga sipai hnena thuneihna sang pekna, Armed Forces Special Powers Act (AFSPA) hlih a nih theih nana chaw nghei a kalpui tawh chu August 9 khian a chawlhsan tawh dawn tih a sawi.

Sharmila hian nimin khan Imphal Court-ah thuthar theh-darhtute a kawm a, chaw nghei a tihtawp hnuah independent-a inthlan chuh a tum thu a sawi. Activist-te chuan Sharmila-i'n a chaw ngei titawp a, inthlan chuh tura ke a pen chhuak tur chu an state-a AFSPA hlih a nih theih nana a bul ṭanna tur a nih thu an sawi. Activist Babloo Loitongbom chuan, "He thutlukna hian min barakhaih hle a, nimahsela hei hian Manipur politics chu bung thar a kai tir dawn a ni", a ti.

Kum 2000 November thla
aṭang khan AFSPA hman duhlohna lantirin Sharmila hian chaw nghei a ṭan a, AFSPA chu hlih a nih hma loh chuan a tawpsan loh tur leh thi ṭhak thleng pawha a beih tur thu a lo sawi fo tawh a ni. Sharmila hi damdawi-inah enkawl a ni a, a inenkawlna senso zawng zawng hi state sorkar chuan a tum sak a, a hnar aṭangin pipe hmangin eitur pek ṭhin a ni.

Supreme Court chuan hmarchhak state ṭhenkhata AFSPA hman mek chu boruak ralmuang tak a awm hma loh chuan hlih a nih loh tur thu a lo chhuah tawh a, Nagaland-a AFSPA hman mek pawh a lo pawhsei sak tawh a ni. Armed Forces Special Powers Act, 1958 hi hmarchhak state pasarih bakah Jammu &Kashmir-ah te hman mek a ni. He dan hmang hian Armed Forces te chuan an rinhlelh zawng dap theihna, man theihna leh a ṭul pawha silai hman theihna dan an nei a ni. Mi tam tak chuan he dan hian mihring te dikna (human rights) a bawhchhia a ni tiin, dan sakei tia sawi a ni ṭhin a, human rights group te chuan an duh loh thu an lo au chhuahpui fo tawh a ni.