Hmarchhak state-te inralring turin hriattir

Union Home Ministry official chuan Thawh-ṭanni khan hmarchhak state pariat-te chu Islam firfiakt lakah an fimkhur a ngaih thu a tarlang.

Union Minister of State for Home Affairs Kiren Rijiju chuan hmar-chhak state 98% lai chu ramri depa awm a ni a, hei vang hian fimkhur tura inchah chu thil thar a nih loh thu a sawi.

Hmarchhak ramri huam chhung km 5,687 aṭanga km 250 chauh chu India ram chhunga awm a ni a, a bak zawng chu International boundary vek a ni. India leh China inrinna International boun-dary thui zawng chu km 1300 a ni a, Myanmar (1643), Bangladesh (1880), Bhutan (516) leh Nepal (98) te a la awm bawk.

Union minister chuan, "Islamic State (IS) te chuan pawikhawihna lian tham thlen tir tumin hma a la reng a, a do let turin sorkar laipui chuan a tih tur a ti ve bawk" a ti. Dhaka-a pawikhawihna a thlen hnu khan hmarchhak state chu dinhmun him lo zawkah a awm a, a bikin Assam state chu a dinhmun a ṭha lo hle a ni. Mahse venhimna khauh zawka ken kawh a ni a, pawi khawihna thleng thei lakah ṭan rual a ngai tih a sawi.

Ministry of Home Affairs chuan firfiakte chu engtik lai pawha che thut thei an nih thu sawiin, fimkhur leh zual a ngai tih a sawi. A bikin Assam chu an chet theihna hmun a nih thu tarlan a ni bawk. July thla tir lam khan Bangladesh-a chhiatna rapthlak tak thlenga pawihkhawihtute nena inzawmna nei nia hriat Assam-ah hian an lut nia sawi a ni a, state sorkar chuan mipuite chu chiai mai lo turin a lo hriattir tawh a ni. Ramri venhim kawngah khauh zawka hmalak a nih tur thu puan a ni a, mipuite chu fimkhur tura chah an ni bawk.

Tripura Director Ge-ne-ral of Police K. Nagaraj chuan Border Security Force te chu Dhaka-a chhiatna rapthlak tak a thlen hnu khan, venhimna khauh zawka kengkawh tura hriattir an ni thu a lo sawi tawh bawk.