MGNREGA hlawh pe chhuak tlaiah Meghalaya langsar

Meghalaya sorkar chuan Mahatma Gandhi National Rural Employment Guarantee Act (MGNREGA) sum 99.23% zet chu a hun takah a pe chhuak lo tih Thawhṭanni khan Rajya Sabha-ah tarlan a ni.

Minister of State for Rural Deve-lopment Ram Kripal Yadav chuan MGNREGA sum 62.42% chu employ-ment guarantee scheme hmanga pek chhuah a nih thu House a hrilh.

MGNREGA hlawh pe chhuak tlaiah Meghalaya (99.23%) hi Chhattisgarh (92.26%) chuan a dawt a, Andaman and Nicobar (90.80%) chu pathumnaah a awm ve bawk. Mahatma Gandhi National Rural Employment Guarantee Act hnuaiah hian hna thawh zawh a nih aṭanga ni 15 ral hmain hlawh hi pek chhuah tura tih a ni. Sum pek chhuah tlai a nih chhanah hian banking infrastructure ṭhat tawk loh vang a nih thu tarlan a ni bawk.

Yadav chuan, "Hlawh pek chhuah tih khawtlai a nih chuan ni khatah 0.05% zelin a pung tur a ni a, chu chu state sorkar pek tur a ni" a ti. Kumin July 21 thleng khan hlawh pek chhuah tlai avanga zangnadawmna state sorkar ten an pek chhuah chu cheng vaibelchhe 3.34 a tling tawh niin a sawi bawk. Ni 100 inhlawhna tih mai, MGNREGA hi state tam tak chuan an kalpui ṭha hle tih tarlan a ni a, a nih tur anga kalpui lo state eng emaw zat an awm bakah, kum khat chhunga mipuite tana ni 100 inhlawhna siam sak lo an awm tih tarlan a ni bawk.

MGNREGA kalpui ṭha tarlan zingah hmarchhak state Mizoram leh Tripura te chu an lo lang tawh a ni.