Arunachal Dy CM-in tuilian tuarte tlawh

Arunachal Pradesh Deputy Chief Minister Chowna Mein chuan an state-a tuilian tuartu hmun hrang hrang ami te chu a tlawh a, MLA leh sorkar mipawimawh eng emaw zatin an ṭawiawm.

Chowna Mein hian tuilian tuar nasa zual Dirak Miri, Rajabeel, Silatoo, Eraloni leh Mahadevpur IV te tlawhin mipui harsatna tawk mekte a kawm a, an harsatna sut kian dan tur a sawipui. Disaster Management leh chhawm dawl hna thawk mekte a titipui bawk. Dy CM hi DC leh sorkar mipawimawh te chuan meeting an lo neihpui a, tui, damdawi leh mamawh dang sem chhuah dan an ngaihtuahho a ni.

Tuilian avang hian Na-tional Highway 52 chu hmun ṭhenkhatah tuiin a chim a, hei hian nasa takin inkalpawhna a tibuai a ni. All Arunachal Pradesh Students’ Union (AAPSU), District Students’ Union (DSU) leh All Tai Khampti Singpho Students’ Union te chuan tuilian avanga harsat-na tawkte chhawmdawl hna hi an thawk ve reng bawk. AAPSU te hian tuilian tuarte hriselna ngai pawimawhin ni sarih chhung zet chu health camp an buatsaih tawh a, hmun hrang hrangah donation camps buatsaihin, August 4-7 chhung khian Capital Complex-ah mamawhtu te tan camp buatsaih leh an tum thu an sawi bawk.

Tuilian tuarte chhawm-dawl hna hi chhun zan zawmin ngawrh tak thawh a ni a, nunna chan leh hliam tuar ngaihtuahawm an awm hriat a la ni lo.