Japanese Encephalitis avangin Manipur-ah school khar

Manipur-a Churachandpur-ah chuan thluak lam natna chi khat Japanese Encephalitis (JE) an tih mai a leng nia sawi a nih vangin Thawhṭanni khan school 18 zet chu khar a ni. Kar kalta khan naupang pakhat chu Encephalitis natna avang hian a boral a, a natna lan chhuah dan tak erawh tarlan a nilo.

Thuneitute chuan he natna lak aṭanga inveng tura hmalak nghal a nih thu an sawi. Naupang damlo 12 te chu endik an nih hnuah Encephalitis hi an vei nia hriat a ni. Heng naupang te hi RIMS, JNIMS, Mothers Care Children Hospital and Research Centre hospitals-ah enkawl nghal an ni. Damlo pakhat chu Encephalitis natna a kai nia hriat a nih avangin kar kalta khan Guwahati pan pui a lo ni tawh bawk. Heng naupangte thisen hi JNIMS hospital, Imphal-ah endik a ni a, Japanese Encephalitis (JE) an kai ngei tih finfiah a ni.

Naupangte hi Imphal West, Thoubal, Imphal East, Churachandpur, Senapati, Chandel leh Ukhrul ami te an ni a, fimkhur thilah Churachandpur-ah chuan school eng eng emaw zat khar a ni tawh. District headquarters dangah pawh school ṭhenkhat chu July thla chhung atan khar lailawk a ni.

State surveillance officer Dr Kh Sasheekumar chuan thosi chi li Culex Tritaeniorhynchus, Culex Vishnui, Culex Quinquefasciatus leh Culex Sitiens te chu Manipur-ah hian hmuchhuah a nih thu a sawi. Heng thosite hi zanah an awm ṭhin tih sawiin, mipuite chu fimkhur turin a chah. Manipur-ah hian tuna natna leng mek Japanese Encephalitis hi kum 1995 khan a lo leng tawh a, mi 200 velin an vei a, 2010 khan mi 100 velin an vei tih fin iah a lo ni tawh bawk. Nikum khan he natna vei hi mi paruk an awm thu tarlan a ni a, kuminah hian nasa taka a pun chhoh mai an hlauh thu an sawi.