Meghalaya-in sakhaw biakna hmun Oct 1 aṭangin hawng dawn

Meghalaya sorkar chuan hri darh tur venna kawnga sorkar kaihhruaina siamte khauh taka kenkawhna hnuaiah October 1 aṭang hian an state chhunga sakhaw biakna hmunte a hawng tawh dawn.

State sorkar chuan June 5 khan sakhaw biakna hmunte hi hawn turin a lo rel tawh a, mahse hri kai an pun chhoh tak zel avangin a sut leh a ni. 

Hemi hnu hian sakhaw pawl hrang hrang hotute chu ṭum eng emaw zat meeting neihpuiin sakhaw hmunte hawn chungchang hi an sawiho a ni. An meeting hnuhnung ber, tun thla tir lama neihah chuan state chhunga hri lengin ziaawm lam a pan chhoh chuan sakhaw hmunte hi hawn an rel a, sakhaw hruaitute pawhin health protocol-te pawh khauh taka kenkawh an remti bawk. 

Health department chuan sakhaw biakna hmun hawn tur chungchangah kaihhruaina khauh tak a siam zui bawk. Kum 65 chung lam, natna benvawn nei, naupai lai leh naupang kum 10 hnuai lamte chu chhuak rih lo turin a ti a, sakhaw hmun hrang hrangah chuan santizer chhawp vek a, a kalte pawh mask vuah vek a, physicial distancing dan zawm tura tih an ni. 

Mi lim, lehkhabu leh thil dangte pawh khawih khap a ni bawk a, ṭum khatah mi tam tham tak awmkhawm a rem lo.