Assam state budget pharh

Assam Assembly Budget Session neih mekah Thawhlehni khan Finance Minister Himanta Biswa Sarma chuan 2016-17 Budget a pharh a, sum indaih lohna chu cheng vaibelchhe 2,880.91 a ni.

National Democratic Alliance (NDA) sorkar a din hnua Assam budget pharh hmasak berah hian Plan Expenditure atan vaibelchhe 29,380. 35 ruahman a ni a, Non-plan atan cheng vaibelchhe 48,873.01 dah a ni. State sorkarin sorkar kum 2016-17 chhunga chhiah aṭanga sum hmuh a beisei zat chu vaibelchhe 78,253.36 a ni.

Scheme thar, Chief Minister Samagra Gramya Unnayan Yojana (CMSGUY) chu kalpui tura ruahman a ni a, kum nga chhunga sum mamawh tur chu vaibelchhe 30,000 niin, hei hian thingtlang khaw 25,425 a huam ang. Tuna sorkar kum kal lai meka State tax revenue aṭanga sum hmuh beisei zat chu veibelchhe 15,634.31 a ni a, Non-tax revenue aṭanga hmuh beisei zat chu vaibelche 5,846.52 a nih thu minister chuan a sawi. State-in central tax aṭanga sum a dawn tur vaibelchhe 18,938.27 aṭanga vaibelchhe 20,246.46 chu Plan grant atan dah a ni a, a bang vaibelchhe 3,527.35 chu non-Plan grant atan dah a ni. State leiba chu vaibelchhe 10,423.26 a nih thu minister chuan a sawi bawk.

Finance Minister chuan sorkar kum kal meka leiba punna chu 2.97% a ni a, chu chu vaibelchhe 2,24,641 a ni a ti a, eiba zawng zawng paih hnua Budget indaih lohna chu vaibelchhe 2,880.91 a nih thu House a hrilh. Chhiah lakna
ṭhenkhat e-rickshaw, candle, citronella oil, gur, jaggery, rub gur, tamarind, khandsari, bottle, nipple, kerosene, packaged drinking water, mekhela chador leh Assamese traditional dress-ah te chhiah lak tihhniam rawt a ni. Heng bakah hian Sarma chuan LED light, gold bullion leh bamboo industry, hospital equipment, tea, cinema hall, cable TV, department canteen leh central police canteen aṭanga chhiah lak chu tihniam rawt a nih thu a sawi. Hetih lai hian bitumen, gold, furnace oil, mobile phone leh cigarette aṭanga chhiah lak chu tihpun tum a ni thung.

Eptu pawl, Congress Legis-lature Party (CLP) leader Debo-brata Saikia chuan Finance Minister hian welfare scheme kalpui zel a nih dawn leh dawn loh a tarlang lo niin a sawi. Opposition leader ni bawk chuan Budget pharh takah hian department dah pawimawh leh hlamchhiah bik a awm niin a sawi bawk.

CLP Deputy leader Rakibul Hussain chuan Anundoram Borooah Awards hnuaia zirlai laptop dawng thei chin thlan dan chu an duh khawp lo tih sawiin, HSLC leh High Madrassa exam-a mark hmu ṭha te chauh pek chu an thlawp loh thu a sawi. Hussain chuan zirlai first division-a pass chinte hnenah laptop pek nise, chu chuan zirlaiteah inelna ṭha a siam zawk a rin thu a sawi.

Hetih lai hian All India United Democratic Front (AIUDF) te chuan Budget pharh takah hian minority welfare chu ngaihthah a ni an ti a, Barak Valley tihhma-sawn chu state sorkar chuan a ngaipawimawh tawk lo a ni an ti. BJP thurualpui Asom Gana Parishad (AGP) chuan Budget pharh a ni ta chu lawmawm an tih thu sawiin, mipuiten sorkar thara an beiseina tih hlawhtlinin a awm dawn a ni, a ti.