Assam tuilianin zual lam a pan zel, ramsa thi zat pung

Assam-a tuilian chuan zual lam ala pan zel a, relief camp 322 sak a nih tawh bakah, Kaziranga National Park ram 80% zet chu tuiin a chim tawh a ni.

Assam State Disaster Management Authority (ASDMA) chuan tuilian hian zual lam a pan zel niin Thawhlehni khan a tarlang. District 19 zet te chuan tuilian hi an tuar a, nunna chan mi 10 an awm tawh a ni. Kamrup, Nalbari, Jorhat, Dhemaji, Darrang, Tinsukia, Golaghat, Chirang, Dibrugarh leh Kokrajhar-a lei eng emaw zat chu tuilian hian a la tawh a, inkalpawhna a buai phah hle bawk.

Jorhat-ah chuan tuilian tuartu hi mi nuai 1.88 chuang an awm a, Dhemaji (nuai 1.85 ), Golaghat (nuai 1.19 ), Bongaigaon (nuai 1.15 ), Goalpara (88,000), Biswanath (78,000), Dibrugarh (75,000) leh Darrang (73,000) te chu tuartu tamna an ni. Tuilianin thlai chinna hmun a chim chin pawh a zauh belh zel a, hectare naui 1.37 zet chu a chim tawh niin an tarlang. Dhemaji, Jorhat, Barpeta, Golaghat, Dibrugarh, Tinsukia, Lakhimpur, Biswanath, Nalbari leh Dhubri-a thlai chingtute chuan tuilian hian an thlai chinna hmun tam zawk chu a chimpil vek tawh tih an sawi. Thlai chinna hmun bakah hian ranvulh leh ramsa dang eng emaw zat chuan tuilian vang hian nunna an chan tawh bawk.

Centre for Wildlife Rehabilitation & Conser-vation (CWRC)-a thawk-tute chuan Thawhlehni khan Kaziranga National Park tlawhin, ramsa thi ruang eng emaw zat an hmuchhuak tih an sawi. Park ram zau zawk chu tuilian hian a chim tawh avangin hnathawktute chuan harsatna nasa tak an tawk tih sawiin, daidanna bang eng emaw zat chu tuilian hian a tichhiat avangin a bul hnaia chengte chu fimkhur tura chah an ngai hial a ni.

DFO Suvasish Das chuan Kaziranga Natio-nal Park area 80% chu tuilianin a chim tawh thu sawiin, sq km 859 vel zeta zau tuiin a chim pil vek tawh a ni, a ti. Tui chim chin a san chho zel avangin an harsatna tawh chu a namai lo hle tih sawiin, anti-poaching camp nei mek forest protection staff-te pawh hmun sang lam pan tura hrilhhriat an nih thu a sawi. DFO Das chuan tuilian avanga harsatna an tawh mek remchanga lak tum sapeltu mi eng emaw zat an awm tih sawiin, venhimna kalpui a harsat thu a sawi bawk.

Ramsa thi zingah hian sazuk 17 leh samak note a tel tih forest guard te chuan an sawi a, ramsa thi ruang ṭhenkhat chu tuilian hian Natianal Hihgway 715-ah te a hnawl chhuah thu an sawi bawk. Ramsa zingah hian hliam tuar an awm bawk avangin Centre for Wildlife Reha-bilitation and Conser-vation (CWRC) te chuan a hmunah kalin chanchhuah hna an thawk reng a ni.

Union home minister Rajnath Singh chuan Assam Chief Minister Sarbananda Sonowal chu phone-a biain tuilian avanga harsatna an tawh mek a sawipui a, sorkar laipui aṭanga
ṭanpuina awm thei ang te pek a tiam. State Water Resource minister Keshab Mahanta chuan tuilian avanga harsatna an tawh mek chungchang hi State Assembly-ah Thawhlehni khan a sawi chhuak a, tun dinhmuna state sorkarin a ngaih pawimawh ber chu tuilian avanga harsatna tawkte chhawmdawl a nih thu a lo sawi tawh a ni. Parliamentary Affairs Minister Chandra Mohan Patowary chuan Bhutan Kurisu tuikhuah lianin Lower Assam hmun eng emaw zat a chim avangin sorkar chuan hma a lak thuai a rin thu a lo sawi ve tawh bawk.

Meghalaya-in tuilian tuar ve leh

Tripura leh Assam-ten tuilian nasa tak an tawrh mek laiin, Meghalaya-ah pawh mi 35, 000 vel zet te chuan tuilian avangin harsatna an tawk ve leh.

Brahmaputra leh Jingiram luilian chuan Meghalaya-a khaw eng emaw zat a chim tawh a, nunna chan erawh an awm hriat a la ni lo. Tuilian vang hian khaw 71 a mi 35, 002 zet te chuan harsatna an tawk mek a, an vai hian Garo Hill phaizawla cheng te an ni. District thuneitute chuan relief camp pakua an sa tawh tih sawiin, sak belh mek zel a nih thu an sawi. Tuilian hian chenna in a tihchhiat bakah thlai chinna ṭhahnem tak a tichhe tawh bawk. Public health, engineering leh family welfare department te chuan tui in tur leh ei tur te an sem chhuak a ni. Tura-ah chuan Emergency Operations Centre din a ni a, chhun zan zawmin ngawrh takin chhawmdawl hna thawh a ni.