Assam-ah 'Mega-mission' kalpui dawn

Assam state sorkar chuan kum nga chhung atan mega-mission, ‘Chief Minister Samagra Gramya Unnayan Yojana’ (CMSGUY) chu a kalpui dawn tih Thawhlehni khan Legislative Assembly House-ah a puang.

State Finance Minister Himanta Biswa Sarma chuan ‘Mega-Mission’ kalpui tur hian ruahmanna engkim siam a ni tawh thu a sawi. He mission, Chief Minister Samagra Gramya Unnayan Yojana hi sorkar kum kal lai 2016-17 aṭanga kalpui ṭan tur a ni dawn a, kum 2021-22 thleng a awh dawn a ni. He mission hian a tum ber chu farm aṭanga thil thar chhuah a leta tihpun a nih thu minister chuan a sawi. Hei hian nasa takin state hmasawna a thlen beisei a ni a, mission hi India Independence champha vawi 75 ruala zawh tura ruahman a ni a, hei hi Prime Minister Narenrda Modi-a vision a nih thu Sarma chuan a sawi.

Kum 2011 chhiarpuiah khan Assam-ah hian thingtlang khua 25,425 zet a awm a, chung khua te chu he mission hmang hian nasa zawka hmasawnna kawnga ṭhan tir tura hma lak a ni. Kum khat chhungin thingtlang khua 6,356 a huam hman zel tura ngaih a ni a, mission hlawhtling taka kalpui a nih theih nan hian cheng vaibelchhe 30,000 ruahman a nih thu Sarma chuan sawiin, kumin bikah a bul ṭan nan nuai 50,000 ruahman a ni, a ti.

Mega-mission hnuaiah hian sub-mission a awm dawn a, chu chuan Fishery Mission, Milk Mission, Organic Mission, Land Management and Conservation Mission, Sericulture, Khadi and Cottage Industry Mission, Road and Broadband Connectivity, Semi-Processing, Processing and Market linkages, Youth-Yoga-Sports Mission leh e-gram Mission te a huam dawn a ni. Sub-mission tin hian a mal ṭheuhin target an nei ang a, chu chuan mega-mission target tihlawh ling turin hma an la dawn a ni.