Human rights pawlin Sharmila ngensak

International human rights pawl pakhat Amnesty International chuan Mani-pur sorkar chu Irom Chanu Sharmila-in thubuai a awrh mek te August 9 hmaa tihtawp sak turin an ngen.

Kum 16 hnua chaw nghei titawp tur thutlukna siamtu, kum 44 mi lakah hian zahngaihna lantir turin Amnesty International hian state sorkar chu an ngen a ni. Amnesty International Project manager Arijit Sen chuan Sharmila-i'n Armed Forces (Special Powers) Act (AFSPA) hlih a nih theih nana a hmalakna chu ropui a tih thu sawiin, a thutlukna zah sak turin sorkar an ngen tih a sawi.

Sharmila hian hun rei tak chhung chawnghei a kalpui avang hian mahni intihhlum tum thubuai siam sak niin, court-ah vawi tam tak a inlan tawh a ni. Manipur ‘Iron Lady’ hian August 9 aṭanga chaw nghei chawlhsan a tum thu a puang tawh a, pasal neia politics-a zuanglut turin ruahmanna a siam. Kum 2017 khian Manipur chuan Assembly Election a hmachhawn dawn a, he hunah hian Independent-in Malom constituency-ah Sharmila-i hian a chuh dawn niin an sawi.