Assam State Assembly titawp lailawk dawn

Assam Assembly Budget session neih mek chu nimin khan titawp lailawk turin rel a ni a, August 8-ah chhunzawm leh a ni ang a, August 13-ah zawhfel beisei a ni.

Business Advisory Committee (BAC) chuan an state-in tuilian nasa tak an tawrh mek avangin session chu titawp rih mai turin Question Hour-ah a ngen a, Assembly Speaker Ranjeet Dass chuan a pawm ta a ni. MLA te chu an bial chhunga tuilian avanga harsatna tawk mekte, a hmunah kala an harsatna tawh mek thlithlai pui turin hun pek an nih thu tarlan a ni.

Assam tuilian hian ni eng emaw zat a awh tawh a, ziaawm lam ala pan thei meuh lo. Tuilian tuartu hi an pung zel a, nunna chan pawh an awm nual tawh a ni. Forest Minister chuan Kaziranga National Park tlawh nghal a tum thu sawiin, hmalak dan tur a hmunah kalin a en dawn tih a sawi. KNP hi Brahmaputra lui kama awm a nih avangin tuilian hian a ram 80% chu a chim tawh a, ramsa thi an pung zel bawk. Manas National Park pawh dinhmun ṭha lo taka a awm mek a, tuilian hi a nasat zel chuan mihring mai bakah ramsa te dinhmun pawh a ṭhat loh hle rin a ni. Assam tuilian hian district 19-a mihring nuai 15 vel zet nunphung a tikhaihlak mek a ni.

Session hi tihtawp lailawk tura tih ni mah se vawiin leh naktuk hian dan pangngaiin chhunzawm leh a ni dawn a, July 31 aṭanga Agust 7 thleng chawlh lailawk a ni thung ang. House-ah hian President Dr APJ Abdul Kalam thihcham vawi khatna pualin hun hman a ni bawk.