Manipur : Imphal East-ah puak thei thil thuhruk hmu chhuak

Indian Army leh Manipur Police-te ṭangkawp chuan Imphal East district-a tlangram, Bongjang leh Itham ah puak thei thil Improvised Explosive Devices (IEDs) thuhruk tam tham tak an hmu chhuakin an sut nghal. Heng ralthuam hmanga pawikhawihna leh vantlang tana chhiatna nasa tak thleng thei tur chu an dang a ni.

Thu an dawn bawhzuiin, Indian Army leh Manipur Police chuan ralthuam dap hna hi a thawk a, ui fingte pawh an hmang ṭangkai bawk. IED pasarih hmu chhuakin, an rih zawng hi kg 28.5 vel an tling. Hengte hi Army Engineer unit-a mithiamte chuan an sut nghal a ni.

Heng IED hmuhchhuahte hian chhiatna nasa tak a thlen thei a, mihring nunna leh vantlang thil tamtak a tihchhiat hmain an hmuchhuak hman a ni. Tute thuhruk nge tih leh, eng beihna tura hman tum nge tih pawh an chhui zui mek bawk.

NRFM-in darkar 18 awh nawrh huaihawt

National Revolutionary Front Manipur (NRFM) chuan nizan zanlai aṭang khan India rama Manipur chhun luh a nih duh lohna lantirin, Manipur state pumah darkar 18 awh tur nawrh an huaihawt.

NRFM information & publicity secretary, Sanajaoba Meitei chuan nawrh huaihawt a nih thu hi puangin emergency service erawh a huam loh thu a sawi. State mipui, leilung fate chu an hmalakna hi thlawp a, India rama Manipur chhung a nih hnua nasa taka rahbeh an nih duh lohna lantir a, bei let turin a chah bawk.

Meitei chuan kum 1949, September 21 khan hetih laia Manipur lal, Maharaja Bodhchandra chuan Indian Union-a Manipur chhun luhna tur inremna a ziak a, hemi hnu 1949, October 15 khan India ramah Manipur chhun luh a ni ta a ni, a ti. Mahse India sorkar chuan an state-ah harsatna hrang hrang thlenin, state mipuite dikna chanvo te pawh an zah sak lo a, state mipuite karah inṭhendarhna tur policy te a kalpui ta zawk a ni, tiin a sawi.

NRFM hi United Revolutionary Front tia hriat ṭhin a ni a, kum 2011, September 11 aṭang khan NRFM tih a ni.