Arunachal : LAC bulah China in heliport thar siam

China chuan Arunachal Pradesh-a India leh China inrina, Line of Actual Control (LAC) bul hnaiah a sipaite hman turin heliport thar a siam nia sawi a ni.

He heliport hi Arunachal Pradesh khawchhak lam, Fishtails region-ah awmin, hei hian China-in ramri hmun kilkhawr zawma sipai dah leh, an hmanruate awlsam zawk a dah luhna kawngah a pui dawn nia rin a ni bawk. Satellite thlalak aṭanga a lan danin he heliport hi sak zawh a ni hnai tawh.

China hian Fishtails region leh, LAC-a a sipaite thuam chakna turin heliport hi a hmang thei dawn a ni. Sipaite tan chet velna awlsam zawk leh, chanchin pawimawh lakhawmna kawngah an pui thei dawn a ni. India nena ramri chungchanga inhmuhthiam lohna an neih mek laiin heliport thar hi a rawn siam a ni. Siam zawh a nih chuan ramri aṭanga km 20 vel leka hlaah a awm ang.