Tripura : Congress-in eirua puh Tribal Welfare Minister ban turin phut

Tripura Pradesh Congress Committee (TPCC) chuan tribal welfare minister Bikas Debbarma chu eiruknaa inhnamhnawiha puhin, minister a nihna aṭanga ban tura an phutna chu governor Indrasena Reddy Nallu hnenah Ningani khan an theh lut.

Congress party chuan Minister Debbarma chu eirukna bakah Election Commission of India (ECI)-a affidavit lem theh luh a nih rinhlelh chungchang pawh chipchiar zawka chhui turin an phut bawk.

Party aiawha Governor hnena ngenna thehlutte hi party president Asish Kumar Saha bakah MLA Gopal Chandra Roy, TPCC president hlui Pijush Kanti Biswas, Adivasi Congress chairman Sabda Kumar Jamatia, MLA hlui Asok Debbarma leh Adivasi Congress advisor Monmohan Reang te an ni. Raj Bhavan-ah kalin Governor an hmu a, ngenna hi an thehlut a ni.

Congress MLA leh Congress Working Committee (CWC) member Sudip Roy Barma chuan memorandum an thehluhah hian, tribal hnamte tihhmasawnna tura World Bank in project thawhna tura Rs vbc 1400 a pek hman a nih dan chu a rinhlelhawm hle tih a sawi. Barman chuan heng sumte hi Tribal Welfare Department hnena pe loin, project thawh hna entu hian a hranin pawl, TRESP din chawp a ni a, hei hian sum hmandanah ngaihṭhat lohna a siam a ni, a ti.

State assembly neih zawh takah khan Barman chuan Minister Debbarma hi a thuneihna dik lo taka hmang a, kum khat lek chhunga nasa taka inhaivurah a puh tawh bawk.

Tripura Congress chuan eiruknaa inhnamhnawiha an puh, Minister Debbarma chu cabinet minister a nihna a ban a, MLA a nihna pawh hlihsak an phut.