Hmarchhak bial hmasawn nan Vbc 1,900 chuang dah a ni: Amit Shah

BJP President Amit Shah chuan hmarchhak bial hmasawnna tur leh eirukna umbo a nih theih nan Manipur mipuite chu Prime Minister Narendra Modi kaihhruai BJP zawm turin a sawm.

Kar kalta Inrinni khan Shah chuan he thu hi sawiin, hmar­chhak bial hmasawnna hnathawh leh eiruk awm lohna sorkar din chu BJP chauhin a thei a ni, a ti a, BJP kaihhruai sorkar laipui chuan hmarchhak bial hmasawnna atan cheng vaibelchhe 1,900 chuang a dah a ni, a ti.

May thlaa Manipur-a Autonomous District Hill Council inthlan neih turah mipuite chu BJP thlang tling turin a ngen bawk. Shah hian Imphal a tlawh hmain Dimapur a tlawh a, state party worker te leh hruaitute a kawm nghal bawk.

Ni li thanga hmarchhak bial tlawhtu, Shah hi BJP general secretary (organisation) Ram Lal leh senior hruaitu Tapir Gao te'n an ṭawiawm a, hmarchhak biala party bulṭhut tihngheh nan leh party tihchak tumin hmarchhak an fangkual a ni.

Shah hian kar kalta Ningani, April 16 khan Mizoram a tlawh tawh a, hemi hnu hian Nagaland leh Manipur a tlawh nghal a ni.

BJP president Shah hian Manipur ah zan khat riakin, nimin khan BJP party office-ah Dr Shyama Prasad Mukherjee Hall a hawn hnuah Delhi-ah a let leh nghal a ni.

Sorkar laipuiin cheng vaibel­chhe 100 senna tur Manipur-a Sport University din a tum chungchang sawiin, university din a nih hunah hmarchhak ṭhalaite chuan Mary Kom hnungzuiin India tan medal an hawn theih ngei a beisei thu a sawi.

April 21 hian BJP president Shah hian Sikkim a tlawh bawk ang a, April 23-ah Meghalaya, April 24-ah Arunachal Pradesh leh April 25-ah Guwahati a tlawh nghal ang. April 27-ah Tripura tlawh a tum bawk a ni.