Zirlai pawlte'n Catholic school te thlavang an hauhsak

All Manipur Students’ Union (AMSU) chuan thuchhuah siam­in, Manipur-a helpawl ṭhenkhatin Catholic school an boycott chu titawp turin an ngen a, April 21-ah an titawp lo a nih chuan school te chu an member te'n an ven tur thu an tarlang.

AMSU general secretary Manjit Sarangthem chuan kar kalta Inrinnia thuchhuah a siamah, AMSU chuan school boycott chu tihtawp a nih loh chuan eng pawh thleng se a hmachhawn zel tur thu a tarlang a, school boycott chu zirlaite zirnain a tawrhphah tawh a ni, a ti.

"AMSU chuan zirlaite dikna chanvo rahbehna a thlir liam mai dawn lo a, zirlaite tan a bei zel dawn a ni. Hemi chungchanga state sorkar a ngawi reng hi thil mak a ni," tiin AMSU thu­chhuak chuan a tarlang.

Eng pawl mahin an thil phut nawr nan zirlaite an tawrhtir tur a ni lo tiin AMSU general secretary Sarangthem chuan a sawi a, zirlaite tana an beihna kawngah zirlai nu leh pate, school thuneitute leh pawl hrang hrangte thlawpna a ngen bawk.

Hetihlai hian All Naga Students’ Association, Manipur (ANSAM) pawhin Kangleipak Communist Party, KCP (MC) helpawlte chu zirna tibuai zawnga hma la lo turin a ngen.

ANSAM chuan thu­chhuah an siamah KCP (MC) helpawlte'n Imphal-a Catholic school zawng zawng an boycott chu ṭha lo an tih thu tarlangin, zirlaite tibuai zawnga chetlakna chuan zirna kal­phung a tichhia a ni, a ti.

Zirna tibuai zawnga chetlakna tihtawp a nih theih nan ANSAM chuan tlawmngai pawl hrang hrangte chu theihtawp chhuaha bei ṭheuh turin a ngen bawk.