Arunachal-ah engineering college hawng dawn

Arunachal Pradesh chuan Papum Pare district, Toru-ah Government Engineering College hmasa ber a hawng dawn.

State Education Minister Tapang Taloh chuan he thu hi sawiin, Union Ministry of Human Resource Development (MHRD) chuan tun hnaiah engineering college hawn a tum thu a puang tih a sawi.

Engineering college thar hawn tur bakah hian college pahnih- Dera Natung (Govt) College, Itanagar leh Jawaharlal Nehru College, Pasighat te chu Rashtriya Uchchatar Shiksha Abhiyan (RUSA) hnuaiah model degree college-a upgrade a nih tur thu MHRD chuan a tarlang bawk.

"Engineering college hi state mipuite'n hman aṭanga kan lo beisei tawh a ni a, nasa taka kan beihna chu tunah a hlawhtlin dawn avangin ka lawm a ni," tiin Education Minister Taloh chuan a sawi.

"State chhunga zirlaite'n technical course zir zawm turin kum tin state an chhuahsan a, sum tak an seng ṭhin a ni. Zirlaite'n senso tlem zawkin engineering degree an nei thei tawh dawn a ni," a ti.