NE oil industry te tan sorkarin fund a tiam

Sorkar laipui chuan hmarchhak bial hmasawnna atana vision document a buatsaihah oil leh gas lakluhte tihtlem nan hmarchhak biala a zawn hna thawktu, oil leh gas industry te tan fund tam zawk pek a tiam.

Union Minister of State for Petroleum and Natural Gas Dharmendra Pradhan chuan tun hnaia Assam a tlawh ṭumin he thu hi a sawi.

Union Minister Pradhan chuan, "Assam Chief Minister Tarun Gogoi ka kawm a, Petroleum and Natural Gas Ministry-in oil leh gas zawnchhuah kawngah hmarchhak bialah investment tih a tum thu ka hrilh a ni," a ti.

India ram hmasawnna intluktlang taka a kal theih nan sorkar laipui chuan hmarchhak bial a ngaihpawimawh thu Pradhan chuan a sawi bawk.

"Hmarchhak bial mamawh phuhruk nana pawn lam aṭanga thil lakluh te chu kum 2022-ah 10%-a tihhniam tum a ni a, hei vang hian hmarchhak bialah sum tam zawk kan thehchhuah a ngai a ni. Oil leh gas zawn­chhuah kawnga kumin July thlaa hmar­chhak vision document peihfel hman turin additional secretary kaihhruaina hnuaiah high level committee din a ni bawk," a ti.

India-in rampawn aṭang­in oil leh gas a lakluhte hi 70% a ni a, India rama oil leh gas laihchhuah zinga 10% hi Assam-a laihchhuah a ni.

Union Petroleum and Natural Gas Minister Pradhan chuan vision document hian hmarchhak bial chu 'Make in India' hmunpuiah siam a tum a ni, a ti a, oil company te chu ṭhenawm ramte nena an thawh hona leh sumdawnna tilian tura a ngen tawh thu a sawi.

Union Minister hian Assam a tlawh chhung­in Assam-a oil zawn­chhuah hna company hrang hrangte'n an thawh mek a zirchiang bawk a, Assam-a oil tharchhuah chu tun hnaiah chhan hrang hrang avanga a tlakhniam avang­in oil company te chu ṭan la thar turin a ngen bawk.