BTC Chief-ah Hagrama Mohilary lakluh a ni

Bodoland People's Front (BPF) hruaitu, Hagrama Mohilary chu nimin khan Bodoland Territorial Council (BTC) Chief-ah lakluh a ni.

BTC Chief lakluhna inkhawmah hian Executive Members (EM) 13 te chu rinawmna thu tiamtira lakluh an ni bawk. EM te hi- Mritnunjoy Narzary, Rajib Brahma, Daneswar Goyary, Ansumwi Khungur Baro, Deben Baro, Ganesh Kachary, Lwmshrao Daimary, Jagadish Sarkar, Bonjar Daimary, Alindra Kr Moshahary, Shyam Sundi leh Maheswar Basumatary te an ni a, BTC Deputy Chief atan Kampa Borgoyari lakluh a ni bawk.

BTC Chief Mohilary chuan EM te hna chanpual chu tihfel thuai a tum thu sawiin, BPF aṭanga member thlantlin, EM seat chang lote chu department ṭhenkhat hotu-ah dah an nih tur thu a sawi bawk.

BPF party chuan Tridip Daimary leh Nerson Boro BTC Assembly Speaker leh Deputy Speaker-ah a ruat thu Mohilary chuan a sawi bawk.

Seat 40 awmna BTC inthlan hi April 8 khan neih a ni a, April 11 khan result puan a ni.

BPF hian seat 20 lain, independent member pathumin an thlawp hnuah member 23 a nei ta a ni. Member 40 aṭang hian BTC Chief thurawn angin Assam Governor chuan nominate member paruk a ruat belh thei bawk.