N'land CM-in duhsak bik nei lo turin BJP president a ngen

Nagaland Chief Minister T.R. Zeliang chuan BJP president Amit Shah chu Nagaland-ah eng party pawh sorkar se, duhsak bik nei lo turin a ngen.

Nagaland CM Zeliang-a kaihhruai Naga People's Front (NPF) sorkar hi tunah hian BJP-in a thawhpui bakah Congress party-in a thlawp bawk a, sorkar laipuiah NPF hian BJP a thlawp thung. Hei vang hian BJP president Shah chuan Congress nena thawh ho a duh lo tih Nagaland unit BJP chuan a tarlang a ni.

Zeliang chuan Naga peace talk chinfel nan state chhunga party zawng zawngte chuan party bik awm lo state sorkar siam an duh tih BJP president Shah a hrilh thu a sawi a, hei vang hian state sorkar thlawp lo party te chuan Naga peace talk a rang lama chinfel duhtu Nagaland mipuite hnenah chanchin dik lo an thlen dawn a ni, a ti.

"Nagaland dinhmun hi min hriatthiampui turin BJP hi kan beisei a, Nagaland dinhmunah chuan Congress pawhin min thlawp mah se BJP a kal hran a thiang lo a, BJP pawhin min thlawp a nih chuan Congress a kal hran a thiang lo bawk a ni," a ti.

Naga peace talk chinfel nan party zawng zawngte chu an thawh ho a ṭul a ni, tiin Zeliang chuan a sawi bawk.

BJP president Shah chuan Chief Minister Zeliang-a thusawi leh ngennate chu a ngaihpawimawh thu sawiin, Prime Minister Narendra Modi hnenah a thlensak tur thu a sawi.