Assam-a tribal naupang nuai 6 hriselna endik dawn

Union Ministry of Tribal Affairs chuan Assam-a tribal naupang school kal laite leh kal lo, mi nuai ruk chuangte hriselna a endiksak dawn.

Sickle cell anaemia natna lakah tribal naupangte dinhmun hi a him em tih Tribal Affairs Ministry chuan a endik dawn a ni.

Tribal naupang endik tur zing­ah hian Assam thingpui huana hnathawk fate pawh an tel dawn a, endik an nih hnuah Tribal Affairs Ministry chuan sickle cell anaemia natna laka an dinhmun tarlanna, health card a siamsak ang.

Sickle cell anaemia natna kai te'n he natna vei vekte nupui leh pasala an neih ṭhin avangin hei hi an fate thlengin an tawrhphah thei a ni, tiin mithiamte chuan an sawi a, sickle cell natna veite laka inneihna tihtlem nan Tribal Affairs Ministry chuan he ruahmanna hi a siam a ni.

Ministry of Tribal Affairs Secretary Dr Hrushikesh Panda chuan naupangte hriselna endik hi kum khat chhunga kalpui an tum thu leh, an hmalakna chu 100%-a tihpuitlin an tum thu a sawi bawk.

Panda chuan sickle cell anaemia natna tihdam nan hian damdawi siamchhuah a la nih loh thu a sawi bawk.

"Sickle cell anaemia natna hi India rama tribal naupangte lakah a hluar hle a, hei vang hian health department te nen ṭangruala zirtirna nasa zawk pek a ṭul a ni. India ram mihring awm zawng zawng aṭangin tribal te hi 8% vel an awm a, mitthi zinga 50% vel hi malaria avangin an boral a ni. Sickle cell natna avanga thihna pawh a sang hle," tiin Tribal Affairs Secretary Dr Panda chuan a sawi.

Assam-ah hian tribal nuai 38 vel an awm a, thingpui huana hnathawkte hi telh an nih chuan nuai 50 aṭanga 60 an tling. Heng zinga sickle cell anaemia natna vei hi 4% aṭanga 5% a tling.