KSU-in Meghalaya East Jaintia Hills-a lei laih tumna an dodal

Khasi Students’ Union (KSU) chuan Meghalaya State Pollution Control Board (MSPCB) hnenah lehkha thawnin, Star Cement Ltd-in Meghalaya East Jaintia Hills-a lei laih mek zauh an tum chu an duh loh thu an thlen.

KSU-te tarlan danin, lei laih tumna ram hi Narpuh Wildlife Sanctuary chhunga Eco-Sensitive Zone a nih mai bakah, Lukha lui bul a ni.

“Star Cement lei laih zauh belh phalna pek chu environment tan a hlauhawm a, khawtual eco-system in a tuar mai bakah, helai hmuna chengte thlai chin leh eizawnnaah nghawng ṭha lo tak a nei dawn a ni,” tiin KSU chuan an tarlang.

Star Cement Ltd in an mining operation zauh an dilna chu ngaihtuahin, MSPCB chuan October 8 hian Brichyrnot khuaah public hearing neih tum a ni.

“Star Cement in lei laih belh an tumna lai hi Lunar lui aṭanga metre 500 vela hla a ni. Company hi phalna pek a nih chuan, Lunar luiah bawlhhlawh paih luh a hlauhawm hle a, Lukha lui thlengin a ti bawlhhlawh thei dawn a ni,” tiin KSU-te chuan an sawi a, cement company hnathawh avang hian tun thlengin lui pahnih chu tlan tlak lohin a awm mek tih an sawi bawk.

Zirlai pawlte chuan Narpuh Wildlife Sanctuary pawh lei laih tumna hmun aṭanga hnai tea awm a nih thu sawiin, he sanctuary hi humhalh mek Hoolock Gibbons leh hmarchhak chauha aw ramsate chenna a ni tiin, “Lei laihna hmun zauh hi phal a nih chuan, Narpuh Wildlife Sanctuary chu ramsa chenna tlak loh, eng atan maha hman theih lohah a chhuak mai dawn a ni” an ti.

KSU chuan October 8-a public hearing neih tum pawh chu ṭhulh tura ngenin, Star Cement company chu Brichyrnot khuaa lei laih belh phalna pe lo turin an ngen. Zirlai pawl hian cement plant siamin environment a nghawng dan leh, khawtlanga harsatna a thlen dante ngaihtuah a, buaipui tura local committee siam a rawt. Tuna cement plant awm tawhte chuan an lui tlanah harsatna nasa tak a thlen tawh a, a thar siam belh a nih chuan lei laih belhin, ram ngaw chereu leh leilung chhiatna nasa tak a thlen zel dawn niin an sawi.