Assam: BJP chief Bhavesh Kalita lakah Congress in FIR thehlut

Assam Pradesh Congress Committee (APCC) chuan Assam BJP president Bhabesh Kalita chu Arunodoi scheme chungchang a sawinaah in vauna ṭawngkam leh, India danpui kalh thil chhak chhuakah puhin Guwahati-a Bhangaharg Police Station-ah complaint an theh lut.

Rangiya hmuna Septemper 19-a mipui punkawmna buatsaihah, Arunoida scheme hnuaia hamṭhatna chu BJP mi leh sate chauhin an chang dawn tih sawiah Kalita chu puh a ni a; BJP member an ni tih finfiahna nei lote chuan he scheme hnuaia thla tin Rs 1,250 dawn tur chu an dawn ve loh tur thu a sawi a ni, an ti bawk.

Social Media leh IT Department chairman Ratul Kalita-an a ho APCC palaite chuan Kalita thusawi chu mipuite vau zam tumna leh sorkar hmalakna chu politics khelh nana hmangah puhin an dem thu an sawi.

Ratul Kalita chuan, “Bhabesh Kalita hian a chhia leh ṭha hriatna a hloh a, mipuite vau zama a dinhmun sawhngheh a tum a ni,” a ti.

APCC Vice President Rupa Deuri, General Secretary Arun Tiwari, leh Secretary Kridip Barman-te telna Congress palaite chuan Kalita chu man nghal turin an phut.

“Mipui sum hmanga hmasawna scheme duante hi politics-a induhsakna telloin khairual takin mipuiah sem tur a ni,” tiin Kridip Barman chuan a sawi bawk.