Dhekiajuli martarte lim hawng

Quit India Movement 1942-a India ram zalenna tur suala Dhekiajuli-a martar tate lim siam chu Assam chief minister Himanta Biswa Sarma chuan Inrinni liam ta khan a hawng.

Heng limte hi Martyrs Memorial Park, Sonitpur district-ah siam an ni. He park hi mipuite tlawh theiha hawngin, ṭhangthar lo awm zel tur ten huaisenna kawngah te an entawn theih tura tih a ni. CM Sarma chuan India ram tana zalenna sual kawnga Darrang district inlungrualna chu ropui a tih thu a sawi. India ram zalenna sual chhuah kawnga Dhekiajuli a hnathawh leh inpumpekna tih lanna film siam turin cultural affairs minister Bimal Bora a ngen bawk a ni.

September 20, 1942 -a Dhekiajuli-a insuatna nasa tak kha zalenna sual kawnga thil thleng rapthlak ber zinga mi niin, martar zingah hian naupang kum 12 mi, Tileswari Baruah pawh a tel a, martar naupang ber a ni.