Assam : Kamrup Metro ah khaw lum vangin school khar

Assam sorkar chuan khaw lum leh uap lutuk avanga zirlai tam tak an dam loh hnuah, Kamrup Metro district-ah September 27 thleng school chawlh a puang. Chief minister Himanta Biswa Sarma chuan school chawlh puan a nih thu hi social media-ah a tarlang.

Assam-ah hian state khawpui, Guwahati tiamin khaw palite chuan September chhunga an record tawh china khaw lum ber tawngin, nunphung tibuai khawp chu an tuar a ni. Thawhṭanni khan khaw lum lam hi 39.6 leh 36.1 degree Celsius a ni a, ṭum danga khaw lum zawng aiin degree celsius pasarih aṭanga pakua in a sang a ni.

Ni li chhung chu khaw lum lutuk an tuar hnuah Thawhṭanni tlai lam hmun eng emaw zatah ruah a sur avangin a ziaawm deuh niin an sawi.

Assam-ah chauh ni loin hmarchhak state dangah pawh khaw lum nasa tak hi an tuar mek. Meghalaya khawpui, Shillong leh Cherrapunji, boruak dai nuam tia hriat ṭhina pawh Thawhṭanni khan khaw lum lam hian 29.9 leh 32.5 degree celsius a kai chho ve bawk. Hei hi an khaw boruak tlangpui ni ṭhin aiin 7.1 and 9.3 degree celsius in an sang zawk. Shillong leh Cherapunjee hi nipui lai pawh boruak dai nuam tak an neih ṭhin avangin zinmiten an tlawh nasa a, tun ṭumah erawh chuan khaw lum avang hian zin mite pawhin harsatna an tawh bakah tourism lam pawhin a tawrh phah a ni.

Regional Meteorological Centre (RMC) in a tarlan danin Guwahati, Dibrugarh, Jorhat leh North Lakhimpur ah pawh September chhunga a lum ber ṭum an tawng a ni. Guwahati-ah hian 39.3 degree celsius niin kum 2023 September-a khaw lum lam record a siam tawh, 38.2 degree celsius chu a khum a, Dibrugarh leh Jorhat ah pawh hian 39.5 leh 37.9 degree celcius niin an record lo nei tawh an rawn khum bawk.